Yennad umγaṛ

[Icerfan]

Yennad umγaṛ


Amγaṛ azemni
mi t-id nesteqsa,
d-acu aγ d-yinni ?
d-acu i d-aγ d-yenna ?

yennad : « ayen yeḍṛan,
γas aken niḍen,
yeḍṛa-d zik yakan,
ur tesaεd d-ac(u) i d-yenulfan… »

iseqf igeni
iγum-d lqaεa,
la-tt-id yettwali
seg was mi tella,
yettwali-d usan
ig bnan leqṛun,
yeẓṛa-d ayen iḍṛan
d-wayen d-iḍeṛun,
yeẓṛa-d irgazen,
mi neqen wiyeḍ,
wigad i γelṭen
mi kemlen di leγlaḍ,

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…

zman k(ra) ig bna
zman i hudit,
ayen yellan yelha
yettuγal dirit,
ayen yellan dirit
yettuγal yelha,
tetezi dunit
tettak nuba,
«xelḍitt a-tt-ṣfu...»,
aka i d-qaren,
«d-ayen ur nettrağğu
i d-yettifririn...»,

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…

lḥeq d-awal kan
d-arbib n tmara,
acḥal it yebγan
ur tufin-ara,
lbaṭel d-aqdim
yis tebna dunit,
γuṛwen mi d-yeqim
lxuf yeceččit,
yis ig ttimγuṛ
win yebγan temγweṛ,
m-ig zmer a kwen iḍuṛ
a wen d-iban yeẓweṛ,

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…

amaγbun meskin
ixeṛb-as yiḍes,
lḥif t-iseγlin
yezuzf-as iγes,
wi rebḥen meskin
bezef ig kseb,
s-lerbaḥ is yezin
yegwad ad yesleb,
wi fehmen meskin
yexṛeb wallaγ-is,
wid it yettwallin
wehmen di suq-is,

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…

i tecbeḥ tayri
γeṛ win meẓiyen,
netta a-tt-yettwali
s tmuγli niḍen,
tettrağğu a-tt-bedel
tmuγli ar γuṛes,
temẓi tederγel
tayri truḥ tuyes,
m-ig uγal muqweṛ
yettnadi fellas,
yesarem a-tt-iẓeṛ
ur d-yegwri layas,

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…

tazmart mi tella
tamusni ullac-itt,
tamusni mi d-tejba
tazmert tfat-itt,
leγlaḍ n-temẓi
yesendan temγweṛ,
yella wa (a)d yilli
ullamek awexxeṛ,
wi ctaqen lehna
ur yufi lat(e)r-is,
win tt-isεan d-ayla
ur yeẓṛ(i) azal-is,

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…

aman zedigen
yisen a tsirdeḍ,
aman ad amsen
kečč a tizdigeḍ,
tesamasm i wid
i wen ibγan tezdeg,
tefsim-as lqid
i wi llan yezleg,
acimi tebγam
a-tt-fehmem temsal ?
qimet aka tellam
a wen gerzen lecγal…

ayen a d-iḍeṛun
γas aken niḍen,
yeḍṛa-d zik yakan
ur tesεaḍ d-ac(u) i d-yenulfan…


Transcription : Icerfan
Modif’s : le 30.12.10