Anida teğğam mmi ?

[Icerfan]

Anida teğğam mmi ?

AΓRIB
A yirfiqen-iw di tlata
a wid i d-yezin fell-i,
lmut, walaγ-ţţ, aţţan da,
walaγ-ţţ, l-ayi-d-ţţwali,

siwḍet lexber i yemma
win i lḥeqn ad as yinni,
int-as : « yemmut wer yenṭer »,
int-as a ţţ-ṣbeṛ fell-i,

ma tect-aq a d-iyi-tẓeṛ
a ţţ-muqel s-udem n-mmi,
γurwet, azent-as ṣbeṛ,
qbel ad ruḥeγ, gallet-iyi…


TAYEMAŢŢ
urgeγ yir targit laεca
γufern-iyi-d lmitin,
ṭefγ itbir di tala
seg fasen-iw i d-(iy)i-tebwin,

uγaleγ dem-γ abuqal
yeγl-iyi mazal lḥiγ,
aman-is, swun akal
iγaḍ-iyi mi teṛẓiγ,

mazal aken di targit
walleγ wi εzizen am ṛuḥ,
yenna-yi-d : «ta d-dunit,
kra teṭefḍ ad am iruḥ…»

ata yusa-d wa walliγ
targit-agi ur di tehwi,
ţţxilek ma (a)k steqsiγ
anida teğğiḍ mmi ?


AMEDAKWEL AMEZWARU
Si lxudma luzin s-axxam
tafat ur ţţ-neţţwali,
acḥal aya ur nemsalam
ur teẓṛiγ, ur di yeẓṛi,

sliγ yes ur t-yuγ wara
la d-ilehu d ceγl-is,
tεewqeγ akw lxedma
wa ur yeţţmeẓṛa d werfiq-is,

laεteb b-weγrum aka
aqlaγ ncab am yilis,
sima nernu dunit-a
a-ţţ-xdem deg-nneγ lebγ-is,

si lxudma luzin s-axxam
tafat ur ţţ-neţţwali,
acḥal aya ur nemsalam
ur teẓṛiγ, ur di yeẓṛi,

hden-id medden fell-as
ma d-tiṭ-iw ur teẓṛ-ara,
steqayeγ-ten kul as
a d-yaweḍ deg usan-a,

iεeţţb iman-is aṭas
ad ixedm i tagara,
ṣbeṛ kan, qrib a d-yas
ruḥ ur ţţxemmim-ara,

si lxudma luzin s-axxam
tafat ur ţţ-neţţwali,
acḥal aya ur nemsalam
ur teẓṛiγ, ur di yeẓṛi,

sin yerfiqen-iw aten-iyi,
ma wallant ? steqsi-ten,
ahaq a ten i d-iweṣi
ṣeḥ a tafeḍ γursen,

ayen akw ad am d-yinni
d-nutni a t-id-yesiwḍen,
fiḥ(el) ma tugwaḍeḍ akenni
mmi-m ur tesaεḍ i t-yuγen…

si lxudma luzin s-axxam
tafat ur ţţ-neţţwali,
acḥal aya ur nemsalam
ur teẓṛiγ, ur di yeẓṛi…


TAYEMAŢŢ
Imi-s a d-iskidib
allen-is mlant-d ṣeḥ,
iḥesb-it mmi d-aḥbib
tideţţ yugwi a ţţ-id-yefḍeḥ,

ad qedmeγ mačči d-lεib
γer wayeḍ ma d-yeṣefṛeḥ,
ayen a d-yinni m-ur t-yeqlib
ugwadeγ tideţţ teqṛeḥ…

« ţţxilek a wagi d-yusan
ur teffer tideţţ fell-i,
m(e)l-iyi d-acu yeḍṛan
anida teğğiḍ mmi ? »


AMEDAKWEL WIS SIN
Ğğiγ-t-in yerwa rray-is
seg widak ig γur zhu,
di lγwerba yufa iman-is
ur d-iţţas, ur d-iţţnulfu,
ğğiγ-t-in yerwa rray-is
seg widak ig γur zhu,
di lγwerba yufa iman-is
ur d-iţţas, ur d-iţţnulfu,

ur d-iţţmekti d-waraw-is
ur d-iţţcegε, ur d-iţţaru,
ur d-iţţmekti d-uxxam-is
naγ yemma-s yeğğa teţţru,
yelha-d ala d-ruḥ-is
ekes seg wallen-im udem-is
menεat kan si daεewsu,
aka i tḍeru d-lmetl-is
mi (i)s tekes tiṛẓi b-wegris
lhem mačči ad as yecfu,

atan yezweğğ d-trumit
ad isali axxam ajdid,
as yaf ixef-is i dunit
lxir fell-as ad yeţţzid,
atan yezweğğ d-trumit
ad isali axxam ajdid,
as yaf ixef-is i dunit
lxir fell-as ad yeţţzid,

ur d-iţţmekti taqbaylit
ur d-iţţmekti agur lεid,
amzum yeεawed talalit
yefreḥ mi (i)s yenğğer webrid,
yeẓṛa yeγḍel tajadit
yemḥa later-is, i εemd-it,
axxam i(g) yeğğa ur yebdid
ruḥ kan seg ul-im (e)ks-it
lbeḥr is yehwun yeččit
ayen ṛẓagen ur d-iţţiẓiḍ…


TAYEMAŢŢ
Lεib-agi ur d-iţţnulfu
deg ẓuṛan i d-yeččetil,
mmi lemer ad aγ yeţţu
mačči deg wagur, qlil…

ekker a yaḍar-iw lḥu
tideţţ ma d-yides a nemlil,
a yul-iw yeqbeṛn, ţţru,
tergagiḍ, fehmeγ-k aḥlil…

« A yimminig d-isawḍen
ţţxilek tideţţ mliyi-ţţ,
zwaren-k-id yerfiqen
kul wa lexber d-iţţawi,

εeddeγ-d akw steqsaγ-ten
nek cukeγ laεben fell-i,
iban γef udem-ik leḥzen
anida teğğiḍ mmi ? »


AMEDAKWEL WIS TLATA
Qim-d a tamγart aεzizen
tideţţ ur tebḍi (γe)f snat,
am inniγ lehdur qaṛḥen
tiṭ-iw ayen yellan teẓṛat,
tecfiḍ i winna i kerzen
lexla-s, s-tidi-s yefsat,
d-akal i t-id-yesekren
i d-yezin fell-as, yeččat,

tecfiḍ i wid yemmuten
mi yedren, γelben taswaεt,
deg yiwet tegwniţţ ruḥen
kul wa, kra i kesb, i xellat,
tecfiḍ i wid yekaten
nwan lğğehd ur yeţţfat,
tecfiḍ i wid d-iţţewten
kul wa lmektub-is yernat,

tecfiḍ leḥyuḍ mi beden
ţţqasamen-d i tafat,
mi d-γlin teḥḍeṛḍ-asen
yeğğan abrid, twalat,
m(e)l-iyi-d (an)wa a d-yeqimen ?
aqlaγ necba di tcemaεt
mi nefsi, nγab γef allen,
ṭlam ad idel tafat,

ur yelli lkedb ay nfaεn
ṣeḥ iban ubrid-is,
am inniγ tideţţ yellan
Rebbi yefra-d ceγl-is,

mmi-m i kelex-as zman
nukwni a nedu di later-is,
mliγ-am tideţţ yellan
εuhdeγ-t mi s-mdelγ allen-is…




Transcription : Icerfan
Modif's : le 25.12.10

[Icerfan]

Anef-iyi kan

Ur ẓṛiγ sani ar γliγ
am lqaf ig cer ufus,
lmeḥna-w degs ţţawiγ
am jeγlal yeddem waεṛus,
ma d-id-muqeln tṣeḍḥiγ
am (w)in mi g-fsi wagus,

anef-iyi kan, anef-iyi kan,
lecγal yakw beddeln amkan…

tawriqt ig εeddan teţţi
nuzen-as tṣwab i tlufa,
ziγ ad aγ d-teţţmekti
tuγaled sanga tella,
imi d-abeckiḍ yeγli
yekfa lbaruḍ i tyita,

anef-iyi kan, anef-iyi kan,
lecγal yakw beddeln amkan…

kul ma d-rzu lmeḥna
d-w(in) ur nuklal a d-txaleḍ,
lbaz ma tqesḍ tninna
ala isγi iwumi i d-tsaweḍ,
kul ma tcerg trakna
aḍar ugujil yeγleḍ,

anef-iyi kan, anef-iyi kan,
lecγal yakw beddeln amkan…

lbaṭel i zdeγ kul tamurt
yezga yeţţi di lmendad,
kul ma teγli tsekurt
ferḥen waraw uṣegad,
aferuğğ i εus tabburt
γef yemma-s ig ţţagwad,

anef-iyi kan, anef-iyi kan,
lecγal yakw beddeln amkan…

necba deg γerbal aqdim
kukran laεbad at ḍegṛen,
as mi g-ṭegiṛ aclim
yeţţağğa smid yufafen,
taẓayeṛt as mi d-teqim
d-amendayer iwumi ţţ-xedmen

anef-iyi kan, anef-iyi kan,
lecγal yakw beddeln amkan…


Trancription : Icerfan
Modif’s : le 25.12.10