Communion avec la Patrie

[Icerfan]

TAMURT
I nek ig γunfa uẓaṛ-iw
d-acu d-asefl-iw ?
anda yella dwa ḥellu ?
xas lḥir yezdeγ ul-iw
kawen ifaden-iw
mi zriγ lğğedra treku,
ţţiktiwin b-warraw-iw
in yerwin alleγ-iw
yal yiwen aken l-ay-fetu…


AGRAWLIW
ţţiktiwin b-waraw-im
im yerwin alleγ-im
yal yiwen aken l-ay-fetu…

Yal yiwen aken l-ay-fetu
lebḥeṛ uγuṛu
nkecmit wis ma γ-yeḍleq ?
ḍlan i tmurt daεewsu
at neggi, at ţţru,
mi teẓra ungif d-amseweq,
mačči s "qul huwa llahu"
is ar a teḥlu,
s-leqraya, s-tegmaţţ d-l'heq,

wi steqseγ ad yinni : kfan,
nfan naγ fnan,
wigad yeţţmagaren lmut,
wid d-yeğğa ṭraḍ iεedan
ẓayit, ṛwan,
kan deg merga n-tefsut,
di lğğefna abruy ur teğğan
s-umezruy glan
γer lkaf zuγṛen tamurt,
di lğğefna abruy ur teğğan
s-umezruy glan
γer lkaf seḥben tamurt…

wis ma ţţalit ig bedlen
naγ d-nekwni ig εawjen ?
iwεer leḥsab i tifin,
a yameṣbaṭli i ruḥen
a d-yeğğ iweṭen
ţţefruruxen ţţilkin,
a yugwadeγ !
d-wigad γi smunedlen
ar a d-yuγallen
yidesn a nberez lesnin…


TAMURT
d-wigad ik wen i smunedlen
asa id yuγallen
yidsen a-ţţ-berzem lesnin…

i wegrawliw aken at ḥemmleγ
kert a-ţţ-nadim later-is
ma mazalit am zik yeḥḍem,
tanaṣlit tuzel deg dammen-is
steqsiteţţ, intas : « naεdem,
aεdaw yuẓad di tikli-s »,
a mi kwen-id iğğaweb
a-ţţ-wehmem, a-ţţ-wehmem !
yal wa ad yesiked aṛfiq-is…


IMDANEN
nqesḍik-id a d-aγ temleḍ
amek aka i tedunt temsal…


AGRAWLIW
luḍa-agi seg i d-kam
sneγţţ asmi d-asawen,
iεdawen-agi d-snulfam
yidesn i nḥefγ ifaden,
amek a yeṛefṛef laεlam
ma ugwint at qadṛent wallen ?
amek ar a yibnin wexxam
ma mcebweln iεegallen ?

ẓṛiγ leqṛaya teγṛam
teγṛam arkwel tilufa,
teγram-tent ur sent ḥulfam
fellawen ur εeddant-ara,
as ma kwen-id qeṣḍen laεwam
s-ciṭeḥ b-wayen akw nesεeda,
as tinim : "ziγ d-asemam
useqi-nni n-tegrawla…"

zemreγ am kunwi ad illiγ
as m-aken legweγ zman,
a d-siseγ ayen akw nwiγ
tagara ugwadeγ ilefḍan,
heţţmeγ di lebγi ayen bγiγ
bγiγ ṣef imeγban,
xas aka di tesga kfiγ
ur ndimeγ g-wayen yeḍran…

nadi-t aẓar n-taεdawt
amer atan gerawen,
afteţţ uqebl a kwen ifat
lḥal ur yelli yidwen,
ma tewtikwen akw tmagart
aret ifeẓ am izamaren,
wi wen innan : « d-acu i ţţafat ? »
intas : « d-iγallen iduklen »

d-nuba-w a kwen steqsiγ
ğğawebt-iyi-d a yatma,
ḥarcaw webrid id bwiγ
asa semreγ di tesga
int-iyi : « isem Amaziγ
ma ţţileli s-tegrawla ?
naγ aken ţţmeyizeγ, ţţwaliγ,
s-akwersi teγṣeb tazla ? »


IMDANEN
nemyesteqsa, nemsefham,
nefhem d-acu ar a nqabel,
tiγṛi-nneγ a d-tefeγ si ṭlam
yal amdan ar d-as isel,

asa amaynut nesaram
ndeh-as ad iγiwel,
yis-nneγ ig cbeḥ laεlam
d-nekwni id ţţerwa laṣel,

a tiγri-nneγ dhen tudrin
smekti-tent γef yiḍelli,
mi sarγayen tizemrin
mi sengaren leḥwaṛi,

azen-d ṣebr i tlawin
ţţilmeẓyin ğğlent ţţirni,
a d-arent s-teγṛatin
a naṛeẓ asalu n-tugwdi,

aḍref yellan d-asuki
at ngarez ad yefk lqeḍ,
tiγri-nneγ, ţţiγri n-tdukli
lmeṛγub ad at naweḍ,

xas yakan akw nemserwi
di leγlaḍ ur ntenneḍ,
neluẓ naγ neda ḥafi
di tegmaţţ ur nrekeḍ…


Lounès Matoub
Communion avec la Patrie - Volume 1 - 1993



Transcription : Icerfan