Slimane Azem - Textes entiers

[Ğerğer]

Afṛux ifirellex


Ay afṛux ifirelles
ak-cegεeγ awid ttbut,
εelli di tegnaw γewes
awiyid lexber n-tmurt,

abrid-ik yeḍheṛ, iban,
deg genni iqeṛb umecwaṛ,
γer Sidi Σabdeṛaḥman
lwali i qublen lebḥaṛ,
inn-as i bab n lbeṛhan :
« Aqlaγ di lγweṛba nenṭeṛ…»,
sellem γef leḥbab aken llan
am asa ncallah ar nemẓeṛ…

εelli di tegnaw reḥel
syenna tṛuḥeḍ qbala,
ar tmurt n Leqbayel
ẓuri-tt-id akw s-lğğemla,
idurar akw d swaḥel
laεzayeb, tudder, lexla,
sellem γef wid-nni nḥemmel
yal yiwen anda yella,

zwir si DRAΣ LMIZAN
ḥewes kra yellan di lḥuma-s,
a-tt-εediḍ γef IZEMRAN
TINIRI tt-γuzza uMECṚAṢ,
a-tt-fγeḍ s AGWNI G ΓṚAN
lḥaṛa-nneγ rzu fell-as,
sellem γef leḥbab aken llan
xas a-tt-nseḍ din yibwas,

kemmel s-adrar n ĞREĞRA
naqel, ali d-asawen,
s-yenna tṛuḥḍ qbala
AT WASIF d ICERIḌEN,
AT MICLI, TIZI N CRAA,
aken id mqaballen,
sellem γef leḥbab merra
d-saddatt IGAWAWEN,

ḍil akinna γer MAYU,
AT YALA d BNI MANṢUṚ,
TAZMALT, AT ΣEBAS, AQBU,
SIDI ΣIC, WAD AMIZUṚ,
ḥader win id ttağğaḍ, cfu,
ẓuṛiten akw, yelha ttfakuṛ,
s-yen γer BGAYET jbu
GURAYA ig εusen lebḥuṛ,

s-yenna ḍil-ed s IBEḤRIYEN
rif rif n lebḥeṛ,
dehm-ed TAMGUṬ aεlayen
ΣAẒAẒGA d BNI YEĞĞER,
MEQLA d AT YIRATEN
γer AT YENNI iqerb umcwaṛ,
sellem akw γef yeḥbiben,
tzureḍ Ččix Muḥend lmexwṭaṛ,


s-yen zegred s IWAḌIYEN
γuṛek ak εeṛqen iberdan,
AT ΣISI akw d IḤESNAWEN
akw d WAKAL ABERKAN,
TIZI WEZU d BALWA εlayen
WAGENUN akw d-lğğiran,
s-yenna dehmed s IFLISEN
awi-yi-d lexbaṛ yellan....



Transcription : Icerfan