Ḥsen Aḥres - Textes entiers

[Icerfan]

Qim yidi ţţxillem

Ad inniγ sgi taεyiḍ
imi id begesḍ a-ţţ-ruḥeḍ,
yurzi-kem w-ul ur tebγiḍ
s-tmara degs tnetḍeḍ,
teţţgiḍ-d abrid i w-semiḍ
kul ma sges twexṛeḍ,
fellas iyi-d ţţ-cetkiḍ
tufiḍ-d seba semeḍ,

qim yidi ţţxillem
xas ma yeγli-d yiḍ felli,
twenseγ yidem
a tafat werğğin nexsi,
mazal-iyi dhiγ yisem
ur iyi-ţţağğa asagi,
imi tiziri-w d-kem
a yagur ḥader ur γelli…

ul-iw ur i bedel-ara
mazal yeqim di temẓi-s,
xas teduγ-as di nmara
yugwi ad yeğğ si leḥq-is,
tin is qaseγ ad yinni “ala”
d-kem kan ay d-lqis-is,
a tinna teğğa tinna
a tayri werğğin nenqis,

qim yidi ţţxillem
anef ayen ig bγun i fat,
meskud telliḍ kem
amaken ḥebsen luwqat,
awid kan ad yesusem
ar γurem lebγi-s yufat,
fellam it mazal yeḥḍem
ul-iw ur tezdiγ tis snat…

nemẓer di tirga-w acḥal
d-ţţiεad werğğin nexḍa,
ar tafsut deg i nemlal
tebwi-yaγ yides tnafa,
ar wasagi id neţţuγal
mi d-ukwiγ targit tekfa,
a tin if i sugetγ awal
ur yi-ţţ-εawad tiyita,

qim yidi ţţxillem
xas ifuk dgem umeni,
ma seḍlem-γ dgem
ţţwaḍelmeγ ulla d-nekini,
ma deg ul-iw ḥebseγ-kem
lḥebs-iw d-kemini,
ar γurem ig ḥebs usirem
ar γurem i tḥebs akw tayri…

semeḥγ idedi lεemri-w
ḥesbeγ-t amzun dayen yeḥla,
xas yesaţţ ger temẓ-iw
ufiγ talwit di tmara,
a tin ṣuḍγ s-yimi-w
imeslayen i d-isufa,
seγli rrij γef ul-iw
ma smendagent cfaya,

qim yidi ţţxillem
qim deg ul-iw mebla aḥulfu,
qim yidi ţţxillem
lğğerḥ i γunza ḥellu,
imi cfayat d-asirem
fellam, yisem ad iḥeku,
a tayri lebda illi-kem
ţţizzliţţ i cebḥ usefru…

qim yidi ţţxillem...



Transcription : Icerfan