Amennuγ
Tafejrit tamezwarut
d-as amenzu di dunit,
si lebḥeṛ yeffeγ-d lḥut
yufa-d iṭij iqubl-it,
kulci γures d-amaynut
yelḥeq-d gma-s yeţţwali-t,
iberz γef gma-s yeγli
yečča-t uqbel ad iṣuγ,
ur ẓṛiγ-ara acimi, lamaεni
asen i d-yebda umennuγ…
i muqel lεebd iman-is
yeswehmit wayen i wala,
yesteqsay deg wallaγ-is
sanda ig teddu ? ansi i d-yeka ?
aken a-ţţ-yefru d ṛay-is
aken ad iqabel azeka,
i refd allen-is s-igenni
yenna-yas : « yisek ar a lḥuγ »
ur ẓṛiγ-ara acimi, lamaεni
asen i d-yebda umennuγ…
tekker-d tmurt γer tayeḍ
tenna-yas : « ad imγureγ,
akal-im ar di teğğeḍ
mullac yidem ad naγeγ,
iman-im ur tezmiṛeḍ
si lsas ar a kem huddeγ,
akal-im ilaq-iyi
snaγ amek ar a tebnuγ »
ur ẓṛiγ-ara acimi, lamaεni
asen i d-yebda umennuγ…
la ţţnadin af tsarut
tabburt wuṛεad i ţţufin,
ceγlen-d ma telhu tefsut
nitni deg wegris γellin,
wa yenna : « ţţḥebiren i lqut »
wa yenna : « mebεid i ţţwalin »,
yuγal kul wa amek yeţţwali
gerasen lefhama tluγ,
ur ẓṛiγ-ara acimi, lamaεni
asen i d-yebda umennuγ…
baba-s aken i d-yelli immi-s
mmi-s yuzel ad yaγ awal,
iḥebs-it-id ccix-is
yennayas : « aha uγal,
innas i baba-k unḥis :
mačči aka i teddunt temsal,
ma di tcegεeḍ ciweṛ-iyi
ma (a)d agwiγ naγ ad bγuγ »
ur ẓṛiγ-ara acimi, lamaεni
asen i d-yebda umennuγ…
farqen leṛẓaq watmaten
kul yiwen yelha waylla-s,
yekker-d umeqṛan degsen
γeṛ umecṭuḥ d ulemmas,
« s-lεemṛ-iw ugwareγ-kwen
lεemṛ-iw yesεa suma-s,
ugwareγ-kwen di tmusni
a kwen agwareγ d-acu a sεuγ »
ur ẓṛiγ-ara acimi, lamaεni
asen i d-yebda umennuγ…
as m-ar a texlu dunit
kullec ad yenger di lqaεa,
ur d-teţţili tfejrit
ṣuq n tudert yefra,
sekra ig llan ullac-it
amzun di leεmṛ ur d-yella,
anegaru ma yeγli
a d-yinni : « wif ar a rfuγ ? »
ur ẓṛiγ-ara acimi, lamaεni
asen ad yekfu umennuγ…
Transcription : Icerfan
Modif’s : le 30.12.10
|