Asendu n waman
Kul lweqt yebwid tiyita,
εedan-d s nuba,
anwa aγilif d-aγ yettun ?
wa yecfa, wa ur yecfa,
tesdukel lḥala
w-ur necfi d wid i cefun,
melmi a d-negr nehta
a yillin d-dwa ?
d-nehta ar aγ yeseḥlun… ?
yiwet γer tayeḍ
taεkwemt a ṭaẓel,
ayen ig ṛxiṣen
aγ d-yas γlay,
abrid i ṣegmen
aγ d-iban yenneḍ,
tasawent yekfan
a d-nexleq tayeḍ,
nettara yewεeṛ
wayen akw i sehlen,
mkul m-ig laq a nẓeṛ
a nebru i wallen…
a wid yestufan
yesenuyen aman,
ig bγan lexṛif
γas bγiṛ lawan,
senduy-t aman
a wid yestufan…
ur d-bwim lexṛif
ur teksem lḥif,
ternam-d aγilif
γer widak yellan…
wid d-innan awal
mi d-zin ttunt,
ak innin : « timsal
akagi i leḥunt »,
taqṣiṭ i d-xelqen
tayeḍ attan tefut,
tin laεben ẓuwṛen
a-tt-laεben s-lmut,
ur telli deg ul
tirugza yiwet,
iḍelli yegul
asa (a)d yeseḥnet,
a wid yestufan
yesenuyen aman…
i tmedit nwen
d-acu i d-awen san ?
senduyet aman
a wid yestufan…
ur yelli wusu
lehna ur d-ttrusu,
ternam-d daεewsu
γer tidak yellan…
s-lekteb d tkerkas
a tḥekmeḍ adrum,
arnu tixidas
a tzwiṛeḍ i lqum,
γas tidett yiwet
kul wa tidett-is,
ma tidett n wa
lkedb axir-is,
ayen akw ig ḍṛan
tneǧǧremt s-ufus,
terram ayen i lhan
anida kwen i xuṣ,
a wid yestufan,
yesenuyen aman…
amek i tettwalim,
tidett ma d-tban ?
tidett mi d-tban,
amek aken i-tt-wallan ?
wallant d-laεjeb
ṭfentt kan teqleb,
rnen-tt d-lekdeb
γer widak yellan…
wi ttrun (γe)f lbaṭel
m-ig zemr i xedm-it,
win yesεan laεqel
degs yezwer yefγit,
acḥal i nḥemel
a nṣegm s wawal,
i tidett nehmel
nesewham lmal,
kul wa la ytezem
ixeṛb lweqt-is,
wi g bγan a-tt-ṣegem
i ṣegm iman-is,
a wid yestufan,
yesenuyen aman…
wa igzemn illa,
wa iṣegemn ullac,
senduyet aman
a wid yestufan…
tcud mkul ansi
tugwim a tefsi,
ternam-d tiyersi
γeṛ tidak yellan…
neṭfitt ans’ aken
ur d-iban yixef-is,
i wid a d-illalen
yewεeṛ webrid-is,
aka a-tt-id-afen
dunit γezzifet,
nukwni ur d-aγ ẓaṛen
tudert wezzilet,
ma tenam-sen
d-acu i ten i ttrağğun,
arnut-as « wisen...»
meqar ad argun…
a wid yestufan
yesenuyen aman…
tlεebm asaru
i deg ur nesεi amkan,
senduyet aman
a wid yestufan...
kemelt asaru,
tlaεbem s lqis,
wisen amek a yekfu,
ma yaweḍ lḥed-is…
Transcription : Icerfan
Modif’s : le 30.12.10
|