Dda Yidir
S-usmendeg ig qeṛeb isufa
times testufa
awid kan ar d-a-timγuṛ,
aṣγaṛ s-wuṛγu i ḥulfa
ur yezmir-ara
awexxeṛ, γelbent leγṛuṛ,
yuγal d-iγed m-ig kfa
bwint γer lexla
yis ar a d-ṛebin tjuṛ...
a Dda Yidir
nerra luwḍa d-agadir,
wi grarben nebγa a t-nezwir
tismin-nneγ di twaγit,
a Dda Yidir
nettuγal kan γer defir,
ayen i lhan ur d-as nezmir
ayen iγ ihuden nḥemlit...
a Dda Σemaṛ
rray-nneγ d-axeṣaṛ
yeskecmeγ di yir lγaṛ
as mi d-nefeγ, dγa a nettu,
xas ma nextaṛ
neḥṣel di yir lğğaṛ
nettnadi wa a d-yerren ttaṛ
mi t-id-yerra ad a nerfu,
ayen i nextaṛ
yettuγaleγ d-ameṣmaṛ
i d-nettaf daw uḍaṛ
γas aken nugwi a necfu,
a Dda Yidir,
ayen i lhan ur d-as nezmir
ayen iγ ihuden nḥemlit…
a Dda Ḥemmu
acuγer nugwi a neḥlu ?
ur nekrif, ur nleḥu,
ruḥenteγ tirga mxalfa,
i deεwesu ?
lğğil γer lğğil yettrağğu
ar asa tugwi aγ tettu
d-iman-is degneγ tufa,
yelha wusu
nesa-yas, l-as nesbuḥru
teččayeγ, tugwi a teṛwu,
tefud, segneγ teswa,
a Dda Yidir,
ayen i lhan ur d-as nezmir
ayen iγ ihuden nḥemlit…
a Dda Σacuṛ
nettmettat ur d-aγ teččuṛ
nefka lemqud i leγruṛ
wi d-yusan ḥesb i kelxeγ,
εeṛqen lehduṛ
win a nḥader a d-aγ iḍuṛ
seg waken xeṛben lumuṛ
yuγal ṣwab i εeṛqeγ,
nedder s-ẓuṛ
asif yettawin tjuṛ,
nequblit almi yequṛ,
i ḥemled yeγẓeṛ, yedmeγ
a Dda Yidir,
ayen i lhan ur d-as nezmir
ayen iγ ihuden nḥemlit…
a Dda Yusef
as mi nγil nerbeḥ nufat
tawriqt-nneγ ziγ tfat
zdat-nneγ yedmitt waḍu,
wa yettmettat,
wa yettγelit di tafat,
wa yufad ugur yenfat
yegwrad ugujil yettru,
leḥsab nekfat
ayen yelhan uḥric yeččat,
nesεa tiγilt naγ snat
a nefreq kan daεwesu,
a Dda Yidir,
ayen i lhan ur d-as nezmir
ayen iγ ihuden nḥemlit…
a Dda Qasi
γas neεya deg usteqsi,
acuγaṛ tugwi a-tt-xsi ?
timest unebdu tḥemleγ,
ur neẓṛi ansi
i d-aγ d-ibedu iγisi
nettak-as lebγi i tγeṛsi
mi nedukel ar d-anennaγ,
tagmatt-nni
fellas kul yiwen yettweṣi
nezratt am dfel tefsi
truḥ wer d-zi felleγ,
a Dda Yidir,
ayen yelhan ur d-as nezmir
ayen iγ ihuden nḥemlit…
a Dda Muqṛan
asa yakw imdanen ḥman
allaγen ḥesbiten ḥfan
laεqel yuγal d-aγilif,
ṣefṛaṣen, ddan
ur ḥebeṛn, ur steqsan,
γas abrid ur d-asen iban
awi kan, nḥer s-asif,
ğğiten kan
dreγlen γas ma wallan
εeẓegn i tidett iwumi slan
neḍmeε ad zuzefn lḥif,
a Dda Yidir,
ayen i lhan ur d-as nezmir
ayen iγ ihuden nḥemlit…
a Dda Σisa
lehna as m-aken i d-steqsa
negwad ur ttnesin-ara
nerett taεdawt-nneγ,
neğğhel, nenwa
ulla d-cwal d-lehna,
deg mi d-nellul, degneγ yella,
nerbat, nugwad aγ yeffeγ,
nesεat d-ayla
s-tismin i-tt-nṛeba
nerrad fellas tibura
aken ad yidir geranneγ,
a Dda Yidir,
ayen i lhan ur d-as nezmir
ayen iγ ihuden nḥemlit…
a Dda Σali
nemdel tabburt mi d-telli
win yebγan aγ yesali
a nezwir degs at neγḍel,
si zik-nni
lhem neččat d-imekli
tiγṛit neččatt d-imensi
nettṛuẓu degneγ lefḥel,
amek akenni
win ay xedmen wer yelli
yeqim mbeεid yettwali
yettrağğu zehr as yeftel,
a Dda Yidir
nerra lewḍa d-agadir,
wi grarben nebγa a tnezwir
tismin-nneγ di twaγit,
a Dda Yidir
nettuγal kan γer defir,
ayen i lhan ur d-as nezmir
ayen iγ ihuden nḥemlit...
Transcription : Icerfan
Modif’s : le 30.12.10
|