Ccix
Win yesεan lkwuca iniγman
lehduṛ-is εeddan,
mebla ma iṣella γef nbi
am aken i d-as nann :
« ur yeqriḥ ḥed usenan
ḥaca adaṛ yeddan ḥafi »
innay- as Ccix :
win iγucen lḥub i melkit
deg ul-is a d-yaγ amkan,
ar leṣlaḥ yettḥerik-it
ur yecqi deg wi εekan,
win yeddan d Llah i selkit
ayen iγ d-yefka ad yilli kan,
a yaṣegad n tfiraεqes
taylewt-ik bezaf tesed,
trenuḍ lquḍ deg tsuqas
i wallaγ amek i εemed,
a win i εecqen deg tmenqas
hader ṭabε ar d-ak yefsed,
rǧiγ ig ṛǧa ufellaḥ
mi yesers tuzzar yeqim,
yettṛaǧu ad huben leryaḥ
ad yefru lḥeb γef alim,
nek a yerǧiγ d-axellaq
d-netta ig tekesn lγim,
yibwas deg usan Ṛebbi
deg usan yecban kul as,
yiwen yebwi aεejmi
yefkat i ččix yennay-as :
ttakeγ adrim d tijεaγl
sεiγ lwiz d-imuden
s-leḥṛam zliγ leḥlal
ččureγ ikufan d-irden
aheq at ḥel snasel
yegul ččix yennay-as
tisirt unγec umenγac
aεedal-is d-areḥwi,
imẓaḍen la d-katen
yal wa ig ẓeḍ a t-yawi,
a win γef yeshel waluy
ḥader iman-ik di trusi,
γef win urzent snasel
as mi yeḥkem uṛumi,
lḥebs ullamek as yerwel
di twenza i t-yettawi,
d-abrid n tlelli ig xtaṛ
d-aḥeṛi laqen-as leḥbas,
ttamurt ig bγa ad i ẓeṛ
ur yeṣbiṛ-ara fellas,
innad ččix asefru
icegεas-t-id yennay-as :
a yul yettḥibin tamurt
ṣebeṛ laεqel d-lεalit,
lfani qelb-as taεrurt
tegḍ-as lemǧaz i tneslit,
d-Ṛebbi ig ttellin tabburt
cedda t-tebεitt talwit,
yettεeday γef medden
win aken i cehwan temγweṛ,
iḥseb imanis nigsen
ur yegi azal i leqdeṛ,
yiwen aken wemdan yesεa
γef lǧib-is ig ttkel,
yezwi γef udem-is leḥya
yeker i ččix as yemel,
ad tteduγ, ad ttweṣiγ
inṭeq ččix yennay-as :
a win i ttεedin tillas
berka-k lḥed d uqisi,
γur Ṛebbi fran akw lumuṛ
a d-ak huden d-akwersi,
a win γef yeshel walluy
ḥader iman-ik di trusi,
a yat usekud yesewḥac
win xtaṛen ad yaγ lexla
iwted ubeḥri d-arεaεac
aqfufi trekbit tawla
win ar a ḍegṛen s-annar
ur yezmir a d-yinni ala…
a yat usekud yesewḥac
win xtaṛen ad yedebdeb
yewted ubeḥri d-aṛεaεac
i ḥuz igweḍman n dheb
win ar a ḍegṛen s-annar
mačči d-leḥwal n lekdeb…
Transcription : Aγvuv
|