[Icerfan]

Imγaṛen n-zman

Nann : ur d-itek usalas
sug xalaf umagraman,
nann : axxam ur nesεi lsas
ur ttlumu imawlan,
nann : kulci ḥudn-as tillas
yelha leḥsab d lmizan,
nann : wi sebedn i leflas
tagara yedda εeryan,
nann : temẓi tettufaṛas,
s-lḥir i tt-εeddin wusan,
qaṛen : yelha leqyas
diri wi tefeγn iberdan,
nann : bu lxiṛ yugwer fell-as
muḥal a t-iḍuṛ zman,
acḥal d-argaz bu tisas
yettwaγeḍṛen di laman,
nann : diri wi qeṭεen layas
cedda d-ttalwit i tt-itebεen,
nann : ur yettali was
γef win yebwin daεewsu i mawlan…

ay ḥkan,
ay ḥkan d way nann, imγaṛen n zman...

Nann : wi jaṛebn lmeḥna
yeẓṛa meskin ṛẓaget,
ma d-win tt-id-yufan tebna
aken yebγa ig sarwet,
nann : win yaεran di cetwa
yeḥsa s-cetwa semḍet,
ma d-win yeṭṣen di tṛekna
γuṛes cetwa d-lğğenet,
nann : iṭij ma yecaṛqed
ur t-itefer-ara uγeṛbal,
nann : asif ma yeḥemled
ur t-id-iḥebes wufal,
nann : times ma tcaεled
tesefsay ulla d-uzal,
nann : tagmatt ma teğhed
yiwen ur yezmir a-tt-yenal,
nann : bu lbaṭel ma yebegsed
yeṣawaḍ γer lmuḥal,
kra b-win yejehlen, yarsed
ayen i xedm ar d-as yuγal,

ay ḥkan,
ay ḥkan d way nann, imγaṛen n-zman...

Qaṛen : argaz bu nnif
aγlay, γer medden yeswa,
aken ibγu yuγal di rif
tzegwired γuṛes tarwa,
nann : ur ttlumu lḥif
mkul aṭan yesεa dwa,
amek ar a tiliḍ d-uḍrif
ma yella uεabuḍ yexwa ?
abrid aken ibγu yuγzzif
kul wa ileḥu aken i d-as yehwa,
iγes deg ig fuk wadif
tettfuku degs lqewa,
qaren : zwağ n besif
d-aṭan ur nesεi dwa,
bab-is yezga deg γilif
amzun d-rehğ ig swa,
nann : medden mačči kif kif
kul wa amek yettak lfetwa,
aṭas ig zha lexṛif,
yedda εeryan di cetwa,

ay ḥkan,
ay ḥkan d way nann, imγaṛen n-zman...

Nann : wi zreεn kra, a t-yemger
d-lxir naγ d-isenanen,
laεyub trağğun tuwser
imiren akw i d-ttlalen,
nann : ur yettwakas ser
γef win yellan d-lmumen,
maεna m-ig γli wazger
ttugwaren γuṛes ijenwiyen,
nann : wi ḍaεfen yettwaḥqeṛ
nekrent ulla d-atmaten,
am lbaz (iw)mi yaṛeẓ yifer
neqlen degs igerfiwen,
qaṛen : yewεaṛ nger
w(in) ur nesεi derya yeḥzen,
win i ten isεan, yeṛwa amdeger
yeṛwa akwesar d usawen,
qaṛen : aken ibγu nḥebeṛ
d-Ṛebbi ig tt-ḍebiṛen,
kra b-win ur nukwi zik, yeker
d-ullac i t-id-iṣaḥen,

ay ḥkan,
ay ḥkan d way nann, imγaṛen n-zman...

Menttif tidett i qeṛḥen
wala lfuṛuḥ n lekdeb,
tidett, win i tt-ihedṛen,
ttarant medden yesleb,
aṭas i neẓṛa desen
win ten yifen, rant yesleb,
tagara ḍṣan fellasen,
mi tawṛiqt nsen teqleb,
lxir d caṛ d-imsaεfen
win ifγen, wayeḍ a d-iqeṛeb,
ullac anwa i ten i fehmen
ala wi llan i jaṛeb,
nann : kulci d-idrimen
win i ten isεan, kulec a t-yekseb,
nif d lḥeṛma γlayen
ur ttnuzun-ara s-dheb,
si zik aka i qaṛen
yelha laεqel d uḥezeb,
i webrid, win ig fγen,
ur k-i-tt-γaḍ ma yegrireb,

ay ḥkan d way nan, imγaṛen n zman...
ay hkan d way nan, imγaṛen n zman...




Transcription : Icerfan