Ad ruḥeγ
Asa yerzad felli lxiq
d-lxiq d-izegwiren i ṛwaḥ,
xas deg ul-iw d-iceqiq
iban ubrid-is yeṛtaḥ,
ẓay felli a d-awen inniγ
wisen ma nεiwed a nemlil ?
ameslay ziḍen, ur tufiγ,
i demmaṛ i d-yerra lmil,
teẓṛiḍ aken a yeẓṛiγ
(γe)f ayen yelhan, ḥed ur yerwil,
ṣwab deg ḍar i terriγ
asagi abrid at yektil,
γer deffir ayen akw ğğiγ
kukreγ ad neqlabeγ,
wisen yibwas ma d-ziγ ?
wisen d-aγrib a neṭleγ ?
ẓay felli a d-awen inniγ
a tiγaltin d(eg) i nummeγ,
ay asif i deg i ttγeniγ
ur uγaleγ a d-ttaseγ,
xas ma ruḥeγ, a d-tt-mektiγ
cbaḥa b-wedrar-nneγ,
ger wallen-iw a kwen ttawiγ
ur tt-εawadeγ a kwen kseγ,
tabburt n temẓi i yerriγ
medleγ-tt γef ayen i εeddan,
medleγ-tt γef ayen tt-menniγ
eğğiγ-ten, yidi ur dan,
ẓay felli a d-awen inniγ
a kwen ğğeγ a wid d-iṛeban,
tettwalim, aken ttwaliγ,
si ṣebr ullawen akw bwan,
ad ruḥeγ sanga ur ẓṛiγ
ur d-cqiγ, ad awḍeγ kan,
lxetyaṛ, wellah ur tesεiγ,
d-Ṣin naγ d-Marikan,
d-lesnin i d-as neqaṛ
azeka cedda ar tifsus,
kul-as yettzad uxeṣaṛ
tarewla qebl a nimsus,
ẓay felli a d-awen inniγ
ad ruḥeγ ay imedukwal,
tikwal akwen i d-ttmektiγ
ma yeğğa-kwen-id uḥemmal,
mačči d-zhu i la ttnadiγ,
xas ma bγiγt iruḥ lḥal,
xtaṛeγ ceḥna a ttεebiγ
wala ad i nehren yeγwyal,
ad ruḥeγ mebla asirem,
ad ruḥeγ mebla immeṭi,
ad ruḥeγ mebla axemem,
alama εyiγ di tikli,
ẓay felli a d-awen inniγ
ad ruḥeγ a kwen ğğeγ arkweli,
xas deg webrid-iw ẓṛiγ
yal ugur yettrağğu-yi,
γas kul ma kerγ ad γliγ
γas lmuğğa ad i tawi,
di lemḥayen a d-ttmektiγ
asa ur yecbi iḍelli,
ayen ig ttεebi wallaγ
d-ayen ur ttεebint tuyat,
lukan zehr i εerqeγ
til(i) (γe)f ayen i nenuda nufat,
ẓay felli a d-awen inniγ
a wid yettrağğun talwit,
akw yidwen wellah ur ttufiγ
ur nettbedil dunit,
deg sirem ur ttekiγ
nsarem ṣbeḥ, tamedit,
aka seg was mi d-cfiγ,
laεmer d-aγ teğğa twaγit,
a yiṭij i d-iceṛqen
anda ad i d-tafeḍ azeka ?
ma qimeγ ad cbuγ medden
taεdel tudert d uẓeka,
ẓay felli a d-awen inniγ
a yiẓekwan a kwen ğğeγ,
γef teblaḍin ttγimiγ,
ur mazal ad qimeγ,
mullac γurwen ččabiγ,
wisen ma muteγ naγ dreγ ?
d-acu lxilaf ttwaliγ ?
kunwi teẓlem, nek beddeγ,
d-awḥid i lliγ gerawen
ur saεḍ ay bedlen felli,
tennam as mi lliγ yidwen :
« yella amzun wer yelli… »,
ẓay felli a d-awen inniγ
a yirfiqen-iw a kwen ttuγ,
waqila aken bγuγ illiγ
tabratt ur tt-id-ttaruγ,
ma yella d-rebḥ a yufiγ
ulayγer a d-awen ḥkuγ,
ma d-lexṣaṛa i deg ar a γliγ
weḥdi kan ar a ttefruγ,
ayen akw ig yeẓiḍen ur ten sin
meqar teṛẓeg nenumitt,
a nṣafer mebγir aεwin
ur telli zyada nebwitt,
ẓay felli a d-awen inniγ
ma ğğiγ-kwen d-acu i xeṣṛeγ ?
di lγweṛba ullac a yesεiγ
ma gerawen, zgiγ xuṣeγ,
ur yelli d-acu i ğğiγ
a d-iγaḍ a teṣruḥeγ,
gerawen d-acu i swiγ,
ur znuzeγ, ur ttaγeγ,
lḥila ay ketben tenγel,
a d-nεemṛ anda niḍen,
a ntebε anṣib, ma yerwel,
d-akwesar naγ d-asawen,
ẓay felli a d-awen inniγ
ad ruḥeγ awen ğğeγ layas,
ayla-w fellas ad nadiγ
kunwi tettrağğum-t a d-yas,
nek xtareγ ad steqsiγ
ad ruḥeγ ad qelbeγ fellas,
mi rwiγ laεtab yak ẓṛiγ,
a t-id-magreγ yibwas…
Transcription : Icerfan
Modif’s : le 30.12.10
|