Tadukla
Lekdeb teṭfeḍ di ṣṛima-s
nann-ak : « anef-as !
ma teddiḍ yides a-ţţ-amseḍ »,
ul-iw bezef εebeγ-as
ţţεebga temal-as
cfuk-id a gma tγelṭeḍ,
tbedleḍ dheb s nḥas
dayen qḍεeγ layas
ẓṛiγ ur d-ţţiḥnineḍ…
tadukli nebna
cukeγ tecfiḍ-as,
rriγ-n laεnaya
thudeḍ-as lsas,
xtaṛeγ-k d-gma
lhem-iw teḍṣiḍ fellas,
ak ţţuγ terra tmara
ig εeddan dayen i εedda
ayen i d-yusan mreḥba-s,
innid ma tecfiḍ
asen deg deflawen ?
innid wi tufiḍ
di temda i γemqen ?
ur ḍelmeγ teẓṛiḍ
asa tesεid iḥbiben,
as ma tendemḍ a d-akwiḍ
tadukli a-ţţ-id mektiḍ
daw wakal zedγeγ dayen,
mačči aka i nwiγ
a d-ffeγ targit,
tdegeṛd-iyi γliγ
anda ullac talwit,
d-azrem i d-ufiγ
deg uxxam mi ziγ tameddit,
εemdeγ yeqes-iyi ţţwalliγ
dunit yides friγ
iwumi sriγ i lferḥ ucmit ?
γurek a-ţţ-γileḍ
yernayi usawen,
mi yi teğğiḍ helkeγ
di tmura ibaεden,
lmuţţ a-ţţ-qableγ
mačči seg wid yugwaden,
d lmektub aka ţţnaγeγ
xas d-aγrib ar a neṭleγ
am frux deg deflawen…
Matoub Lounès
Lbabur
1985
Transcription : Icerfan
|