Taktunya
Am tektunya di tyersi-k
mačči d-ayen i d-yeţţeksen,
γer deffir i ḥebsiţţ yiles-ik
γer zdat tugwi a-ţţ-qedem,
ma yesusf-ik-id wakal-ik
nqeḍn segs amur-ik
ma ullac lehna di tmurt-ik
ur ţţeţţnadi anda niḍen,
m(a) ur tukiḍ d yiman-ik
sers (de)g webrid taεkwemt-ik
ḍeqṛ-as tamrart i yiri-k
naγ taṛṣaṣt γer ger wallen…
tḍul armi truḥ teγṛibt-ik
wid mu truḥ ma d-uγalen ?
tufiḍ lebγi-k di lγeṛḍ-ik
ur d-zgiḍ seg wi ḥaren,
m(a) ur d-ak temli tezmert ik
(γe)f usan ik i d-iḥarṣen
… ad yegwri yixef-ik
ma yegwra uqezb i lεemr-ik
tesewḥac tudert-ik
i d-yegwran anda niḍen,
kečč ur yesakwi was-ik
ur tesgan tmeddit-ik
arnuy-as cṛab i lḥif-ik
teglilezḍ (de)g karṭunen…
tuγal d-amenkeṛ tikli-k
aεyan akw deg-k yeḥbiben,
andaken zint wallen-ik
ugwin ak i d-muqlen,
atan lḥiḍ d-unyir-ik
sigwet-as i twenza i εaksen,
naγ ţţektili (de)g webrid-ik
ţţawi, ţţerra, aqjun yif-ik
ala kečč d-yiman-ik
d-yiwen a yezmen yiwen,
(an)wa (a)r at aεjeb teqbaylit-ik ?
leqbayel asa mačč(i) am zik
asa, aqbayli d-idrimen…
wisen amek is yega wul-ik
i tmerhunt yeţţganayen ?
ma mazal dges tayri-k
naγ d-nniya ig nxuxlen ?
tesḥeṣleḍ degs arraw ik
ma yeţţu iγured win yurwen,
ur teṭifeḍ (de)g wawal-ik
ayen yakw d-yehdeṛ yimmi-k
ţţemẓi-s i t-jeggeḥ, tumn-ik
yedḥa-d d-aγebeṛ s-allen,
ma yuγal d-abrid wexxam-ik
tabburt yellin, d-afus ik,
ma i bedred ḥed di nif-ik
d-keččini ig xnunsen…
am tektunya di tyersi-k
mačči d-ayen i d-yeţţeksen,
γer deffir yugwi yiles-ik
γer zdat tugwi a-ţţ-qedem,
ma yesusf-ik-id wakal-ik
nqeḍn segs amur-ik
ma ullac lehna di tmurt-ik
ur ţţeţţnadi anda niḍen,
m(a) ur tukiḍ d yiman-ik
sers (de)g webrid taεkwemt-ik
ḍeqr-as tamrart i yiri-k
naγ tarṣaṣt γer ger wallen...
Zedek Mouloud
Liḥala n tmurt
2008
Transcription : Icerfan
|