Sahel

Sahel (http://www.sahelkabylie-infos.com/forum/index.php)
-   Chansons completes (http://www.sahelkabylie-infos.com/forum/forumdisplay.php?f=29)
-   -   Zedek Mouloud - Textes entiers (http://www.sahelkabylie-infos.com/forum/showthread.php?t=492)

Icerfan 08/06/2011 18h44

Zedek Mouloud - Textes entiers
 
Da Lmulud wis sin


Zedek Lmulud yuklal as neqar Da Lmulud. Acku, yella Da Lmulud Mammeri (ameqwran ger imeqwranen) dγa ihi nezmer as neqar Da Lmulud amecṭuḥ naγ Da Lmulud wis sin. Yiwen usqerdec nsen : tira. Amezwaru tira ines tettfγed deg idlisen s tefransist (xas aken aṭas ig qdec af tira n tmaziγt), wis sin d-isefra s tezwawt, s tagi-nneγ, aken is yeqar Mohya.

Zedek Mouloud yellul di taddart n wat Xelfun, deg wat Dwala, deg segwas n 1960, as imensi n listiqlal, aken qarent temγarin :-)

Tasfift-is tamenzut tefγed deg segwas n 198ε, yesema-yas : Yemut d-aγṛib. Tanegarut di 2008, yeqar-as : Liḥala n tmurt. Seg imiren ar asa, s-usqerdec n tidett, Zdek Lmulud yuγal d-ajgu n cna d isefra n teqbaylit.
Imeslayen ines zḍan, weznen, sεan azal ameqwran. Tikwal, xas ma tesneḍ taqbaylit, ur tfahameḍ-ara kra imeslayen id yeqar skud yesqucuḍed si teqbaylit-nni taqurant. I win yebγan ad yisin tagi-nneγ, Zdek Lmulud d-lakul.

I win yebγan, atta tansa :
http://www.zedek.fr/index.html


Par déférence pour Zedek Mouloud, nous pourrions l'appeler : Da Lmulud. Mais il existe en existe déjà un : Da Lmulud Mammeri (grand parmi les plus grands). Alors nous pourrions dire Da Lmulud amecṭuḥ (jeune) ou Da Lmulud wis sin (deuxième du nom). Le travail de l'un et de l'autre se situe autour du verbe, de l'écriture. De son écriture, l'aîné écrivait en français (bien qu'il ait également beaucoup oeuvré quant à l'écriture de Tamazight). Le plus jeune des deux, a opté pour la poésie en kabyle ("la nôtre", comme disait Mohya).

Zedek Mouloud est né à Ait Khelfoun (Ait Dwala) en 1960 (à la veille de l'indépendance, comme disent nos grands-mères :-))

Son premier album, 1983, avait pour titre : "Mort en exil". Le dernier date 2008 : "L'état du pays". De ses débuts à nos jours, grâce à un travail sérieux, Zedek Mouloud est devenu un pilier de la chanson et de la poésie kabyles. Parfois, alors même que nous pensons maitriser notre langue, nous nous retrouvons comme sidérés face à notre incompréhension car il va puiser ses mots dans ce que la Kabylie a de plus profond, de plus ancien. Pour qui veut encore apprendre "la nôtre", Zedek Mouloud est une véritable école.

Pour en savoir plus :
http://www.zedek.fr/index.html

Icerfan 08/06/2011 18h48

Di lmut-ik


Di lmut-ik a d-tlaleḍ
alamma temuteḍ
ar ẓṛen medden lqima-k,
di ṛwaḥ-ik a d-uγaleḍ
alamma tṛuḥeḍ
a ṛuḥen ad nadin fellak,
imiren ar a t-idiṛeḍ
as m(i)ar a txaṣeḍ
imiren ar a(d) yeban wayla-k,
imiren ar a t-idiṛeḍ
as m(i) a ten txaṣeḍ
imiren ar a(d) yeban wayla-k

as m(i)ar a d-zgiḍ akin
s-yagi tṛuḥeḍ dayen,
ad fake(n)t (γ)er medden tismin
m-ar a t-fakeḍ ger wallen,
yal m-ar ak i d-smektin
ad nẓemn, ad ṣḥeṣfen,
isem-ik a d-yeglu s-meskin,
yal m-ak i d-yebder yiwen,
di lmut-ik, di lmut-ik a d-tlaleḍ…

yal yiwen as iban yeγfel
yal yiwen as iban iḍul,
kra b-win ik yarren d-cγul
kra b-win ik i sεawğğen lumuṛ,
win ik i kerhen, ak iḥemmel
ul-is as i gan leγṛuṛ,
ak i wali anda imuqel
tenγel tiṭ ma d-ay teccuṛ,
di lmut-ik, di lmut-ik a d-tlaleḍ…


taswayt a-tt-xdem ceγl-is
ayen kecc ur texdimeḍ-ara,
a d-err i wmeγbun leḥq-is
ad tt-uγarment tregwa,
wi ḍelmen ad yezem iman-is
win i ndemen ur k-id-yetterra,
yal yiwen ayen yegza yiles-is
a d-as d-ijbed lexyaḍa,
di lmut-ik, di lmut-ik a d-tlaleḍ…

as m-ara a sen d-ğğeḍ ilem
g wayen ğğan, yeğğaten lḥal,
ma ten i d-yeqabel yilem
s-yilem a qabeln lḥal,
ad ẓern ig xeddem yilem
ad ẓern i γeḍṛiten lḥal,
ur ttafen dwa i yilem
ur ttafen dwa i lḥal,
di lmut-ik, di lmut-ik a d-tlaleḍ…
di lmut-ik, di lmut-ik a d-tlaleḍ…



Transcription : Icerfan

Icerfan 08/06/2011 18h51

Ẓeṛ amek


Ẓer amek iγ texdem tayri
a yul-iw,
ẓer amek iγ texdem tayri
a yul-iw,
muqel amek i bedel kulci
nebweḍ almi i nebra i kulci
a yul-iw,

mačči d-usan ig bedlen
d-nukwni ay bedlen wusan,
ma yebεed wayen i baεden
a nfak kan deg wayen yellan,
d-ţţaswayt asagi ig ḥekmen
d-snasel-is i d-aγ yurzen
a yul-iw,
yal wa yeg(e)r anda niḍen
yal wa d-sebba it yeṭfen
a yul-iw,

ẓer amek iγ texdem tayri
a yul-iw,
ẓer amek iγ texdem tayri
a yul-iw,
muqel amek i bedel kulci
nebweḍ almi nebra i kulci
a yul-iw,

ayen aken i dregn af allen
wisen ma yederg-ak a yul ?
ma yuyes win yesarmen
ma d-ak yer tablaṭ a yul ?
theḍreḍ lehdur fuken
ulla aken ur k yefhim yiwen
a yul-iw,
asa seg wayen i futen
ala asmekti iγ d-yeqimen
a yul-iw,

ẓer amek iγ texdem tayri
a yul-iw,
ẓer amek iγ texdem tayri
a yul-iw,
muqel amek i bedel kulci
nebweḍ almi nebra i kulci
a yul-iw,

tecfiḍ asmi neţţargu
ur neclig di swa’b m-ur yelli,
amek aken kulci d-zhu
amek aken akw neshel kulci,
tecfiḍ as mi ţţ-neţţrağğu
neţţagwad ur d-ţţruḥu
a yul-iw,
tecfiḍ as mi is nḥeku
tecfiḍ as mi is ncennu
a yul-iw,
tecfiḍ as mi ţţ-neţţrağğu
ur neţţamen ad a-ţţ-newεu
a yul-iw,
tecfiḍ as mi is nḥekku
tecfiḍ as mi is ncennu
a yul-iw,

***

a tin ur d-fdi tmenna
ay nniγ d way nniγ,
a tin ur d-fdit tira
d-adlis ad yeg wayen uriγ,
a tin ur d-fdi-ara cna
s-γurem i cudeγ ayen cniγ,
a tin ur d-ifdi ucemma
af sin icidan ḥsiγ,

a tin (yi)s icbeḥn iberdan
a tin wugud (γur²) tecbeḥ tikli,
a tin (yi)s iziḍit wusan
ay ziḍ yidem iγimmi,
a yagur mu zin yetran
acḥal tzaded i tmuγli,
a tin s izehren wuḍan
a tin aεzizen felli,

sked wer n-uzneγ γurem
kra bwi mugreγ innγ-as,
yeḍḥad wayen akw xuṣeγ dgem
txusḍ-iyi d-yir lexṣaṣ,
dwa b-ul-inu d-kem
degm ar a ţţnadiγ fellas,
ma lliγ-am deg ul inem
smekt-iyi-d yiwen was,

wisen amek i-ţţ-id-mlaleγ ?
amek aken akw tegla yisi ?
yecbeḥ lawan (de)g i ţţsneγ
texleḍ tiselbi i temẓi,
tcebḥed, dges εecqeγ
ziγ aken i txedem tayri,
as m-id ḍal, dges muqleγ
d-lεid ig εedan felli,

ḥemleγ-ţţ as maken tella
ḥemleγ-ţţ as maken ur telli,
xas ma yella lğğerḥ iḥla
yeḥla (yeḥya²), yeğğad cwami,
xas asa g-udem-is yeḥfa
ullac ig cban tayri,
ahat ayen dgi d-ğğa
ğğiγ-as-t ulla d-nekkini ?





Transcription : Icerfan
Modifs le 12/11/10

Icerfan 08/06/2011 18h57

Lemer

Lemer d-ik terbiḥ a yul
tili ata aqlaγ gerasen,
lemer d-iγ terbiḥ a yul
tili ata aqlaγ gerasen,
imi ur d-ak terbiḥ a yul
aqlaγ nebεeḍ fellasen,
imi ur d-aγ terbiḥ a yul
aqlaγ nebεeḍ fellasen,
ur nwiγ tizi a-ţţ-ḍul
mačči d-yiwet i di ṛuḥen,
weḥceγ-ţţ ad i d-smuqul
m-ad muqelγ anda niḍen,

tagara ṣwab d lmeεqul
d-ancaf id i d-ikeččmen,
lemer ţţamneγ d-aḥeckul
naγ yella kra di yuγen,
qedem-γ ṣebḥ b-uwtul
ṣbuḥ-iw deg ucanen,
ma yugwi ibibi weγyul
d-acu aka ar as d-yeqimen ?

a yimi yezwaren arkul
d-abelbul i d-yenawlen,
a tenḍeγ tidi s-lmul
as mi texṛeb d-ifasen,
nenuda rebḥ ur t-nenul
d-acu aka i d-rbeḥ ? wisen,
tedduγ g brid mi mellul
tura fsin ideflawen,

s-amer amallag a tenẓul ( ?)
ḍḥan-d (ḥṣiγ²) iberdan waεren,
ma yeẓṛa wugud yedukul
winnaken i kwen izdukulen,
imi dunit d-lakul
yeţţεeḍwi degs, i qaren,
yeẓṛa yeḥnet ma yegul
mačči d-yiwet a d-isγaṛṣen,

yal abεuc dges illul
awekiwen, aẓaγṛiwen,
a yiniγem uhu yeḥbul
umallah a yibzizen,
ur d-as nufi dwa i wqeẓul
d-ţţisendit i d-yesfayen,
d-win tenwam d-ameḥbul
tikwal i tent i d-yeţţafen,

tambult, iqwjan d lwacul
a wi wqan deg senanen,
wi rran ullac d-azamul
w'ar a yaf deg ilmawen ?
wi rran ullac d-azamul
wi g ufa deg ilmawen,
ayagi ik nniγ d-agzul
wama ayen din d-isalen,
ad asen d-fkeγ d-azul
i warrac d izamaren


Zedek Mouloud
Liḥala n tmurt - 2008


Transcription : Imminig / Icerfan

Icerfan 08/06/2011 19h00

A yusu


Tebwiḍ dnub a yusu
acimi akka id duqseγ ?
ẓṛiγ tebwiḍ daεewsu
mi tṣeγ citeḥ a d-friwseγ,
imi iḍes ur d-iţţrusu
s-immeṭi ak slexseγ,

ţţruγ γef ayen yefuten
yeğğayi, yeğğa cama,
tezriḍ ifut-iyi dayen
lamaεna lebγi-s yella,
mi t-id-rriγ ger wallen
a yifat lebγi b-wasa,

ţţruγ γef ayen deg i lliγ
d-wayen deg a-ţţ-idirreγ,
ur i yelhi, ur d-as lhiγ
ur yefhim, ur tefhimeγ,
yeḍefr-iyi-d mi teğğiγ
iḥebs-iyi mi tezuwreγ,

tebwiḍ dnub a yusu
acimi akka id duqseγ ?
ẓṛiγ tebwiḍ daεewsu
mi tṣeγ citeḥ a d-friwseγ,
imi iḍes ur d-iţţrusu
s-immeṭi ak slexseγ


ţţruγ γef ayen d-iteddun
d wayen a d-zuγren wusan,
weḥceγ s lḥif a d-glun
ugwadeγ a d-rnun urfan,
ayen akw i buben leqrun
γuri ad as d-yegwri wemkan,

ṭṭif sel ilindi ilinidi
ṭṭif ilindi asegwas-a,
γuri yifit iḍelli
γef ayen id ibanen asa,
azekka amek ar a yilli
mi asa yegzem tasa ?
ihi wabel d-asefli
mi qabel yuger aya !

tebwiḍ dnub a yusu
acimi akka id duqseγ ?
ẓṛiγ tebwiḍ daεewsu
mi tṣeγ citeḥ a d-friwseγ,
imi iḍes ur d-iţţrusu
s-immeṭi ak slexseγ




Transcription : Icerfan

Icerfan 08/06/2011 19h11

Din din


Tikwal ad ţţmeslayeγ
alama briγ-d i yisem-im,
imeẓuγen-iw ma ten amneγ
ma ten id careg taγuct-im,
d-akelex i sent ţţkellixeγ
i wallen-iw s lexxyal-im,
ğğiγ-kem ur kem ţţağğeγ
ğğiγ-kem ur ğğiγ tayri-m,
ma ğğiγ, ğğiγ ar d-ğğeγ
ayen akw id ğğa targit-im

limer a-ţţ-ẓṛeḍ i yiga yiḍ
felli ma d-mdel tebburt,
d-udem-im is i d-yegellu yiḍ
yeţţbedayid γef tebburt,
tikwal qareγ-as : a yiḍ
i lemer a d-deger tabburt ?
a d-cerreg g wagu-k, a yiḍ,
a-ţţ-lli i wmeḥbus tebburt,

tabburt b-ul-iw γelqeγ-ţţ
as maken im ţţelldiγ i kem,
kra n tin yellan din ḍumeγ-ţţ
regleγ-d (selγeγ-d²) imerğğan yisem,
dges tayri-m srekdeγ-ţţ
anta ta a-ţţ-id yesufγen ?
tayri-w am tebṛa-ţţ cemeγ-ţţ
yekfa lmidad ar γurem,

yal mara kem-id mektiγ
γurem a-ţţ-nwiḍ-d a kem ţţuγ,
amaken yidem i ţţilliγ
amaken yidem i leḥuγ,
tikwal mi degs ţţwalliγ
teswiṛa-m a d-as ḥekuγ (sruγ²),
lemer ufiγ mi kem bγiγ
am sefru a kem-id snulfuγ,
limer ufiγ mi kem bγiγ
din din a kem-id snulfuγ,

lemεahda-w mačči g ibwas
amen-iyi ma d-nuṭti umnent (?),
werğğin ur εeddeγ tillas
ma d-kem anadi γersent,
yal mara megreγ tullas
ţţwaliγ-kem gerasent,
aken bγunt cebḥent tullas,
ur ţţagwad tifeṭent
mi t(en)t iḥewes nadam ṭṣeγ
targit a kem-id siweḍ,
aha am qaṛeγ id qaṛeḍ
mi d-ḍṣiγ a d-am neḍṣeγ,
amzun am asen dgi i tesneḍ
niγ-am acḥal kem ḥemmleγ,
niγ-am acḥal di tḥemmleḍ
lemer a-ţţ-ẓṛeḍ ayen ḥemmleγ,
targit i deg ad sfeqḍeḍ
lemer a teẓṛeḍ ma d-kreγ,
ma d-akwiγ ur di tẓaṛeḍ
bequγ γuṛes ad uγaleγ,
awid kan a d-uγaleḍ,
bequγ γures ad uγaleγ,
awid kan ad i tamneḍ.


Zedek Mouloud


Transcription : Icerfan

Icerfan 08/06/2011 19h16

Azemmur

Wisen amek qerseγ-d, γliγ-d
deg wefras naγ deg wafrasen,
s-umextaf zwin-iyi-d
naγ d-aḍu-nni d-isuḍen,
nudan-iyi, ufan-iyi-d,
ḥuzan-iyi deg fasen nsen,
s-aqecwal rran-iyi-d
mi teččuṛeγ ad ineγlen,
i wεemmuṛ tezin-iyi-d
feṛḥen mi d-sawḍen,

yal as sefqaden-iyi-d
armi yebweḍ dgi a yiẓḍen,
γer tesirt sekcemn-iyi-d
iγuṛaf tezin, tenḍen,
γer wefṛac ṭefn-iyi-d
ur tefγeγ ar d-imeḥqen,
lliγ d-aεeqqa gern-iyi-d
d-aṛebuẓ a yisufγen,
fukeγ ẓid, ekesn-iyi-d
γer tesilţţ ad iyeẓmen,

tatemunt tedegr-iyi-d
d-ţţaẓayt-is ig ẓayen,
tabextit tesaf-iyi-d
aman armi d-uzagen,
felli smaren-ten-id
d-nekkini ig maren,
kaweγ kan, ḍeqeṛn-iyi-d
d-amegruj ad ṣeṛγen,
zit-nni ktalen-ţţ-id
ma d-amureğ s-iḥḍunen,

mi kaweγ kan ḍeqeṛn-iyi-d
d-amureğ ad serγen,
zit-nni saferen-ţţ-id
ma d-amureğ s-iḥḍunen,
d-azemmur lqweḍen-iyi-d
γef zit-iw i d-iluqḍen,
d-azemmur lqweḍen-iyi-d
γef zit-iw i d-iḥemmlen,

***

γef zit-nni d-iḥemmlen
zit-iw d-dwa b-uqbayli,
ad yedhen, ad yesisen,
anida yedda a-ţţ-yawi,
akal-nni i t-id-yurwen
ariḥa-s as d-ismekti,
d-leqrun ur a-ţţ-bedlen
wisen ma yaken aqbayli-nni ?




Zedek Mouloud

Transcription : Icerfan

Icerfan 08/06/2011 19h19

Tidak

A tidak id yeţţasen
ur yenuda ḥed fellasent,
a tidak id yeţţasen
ur yenuda ḥed fellasent,
a tida(k) akw i deg i nkeččem
amek almi i nga daxel nsent ?
ma d-nukwni i t(ent) i d-yeţţafen
ma d-nut(en)ti, amek iγ d-ţţafent ?
a widak yeseḥsaben
yexḍa i leḥsab win ḥesbent…

ma d-ay fellaγ teseγleb
amer ur s-nezmir-ara,
ma d-ay fellaγ teseγleb
wisen m-ur d-as-nezmir-ara ?
sekra b-win γer nqeṛeb
nufat yebεed mi nuẓa,
ixef-is winna if i nqeleb
yesen anida i t-yeγeba,
yeţţbaned umergu n-cḍeb
ma yeγli fers i tṣeḍwa…

anwa i mačči d-axṣim-iw
anwa wer neğği tama-w ?
anwa i mačči d-axṣim-iw
ala win yeğğan tama-w ?
bwiγ abrid s-yimmi-w
ktalleγ abrid s-wayla-w,
ma tγileḍ aεğğebγ imaniw
m-ur d-ak teεğğib liḥala-w ?
tawuṣt teṛṣa g cḍaḍ-iw
yeqeṛṣ ibid a yagaw,
ma tγileḍ aεğğebγ imaniw
m-ur d-ak taεğğib liḥala-w ?
mi tezgiḍ deg jufar-iw
i briγ i yibid a yagaw…

mačči d-kečč i di yerḥan
a yawal mi d-ak selleγ,
mačči d-kečč i di yerḥan
a yawal mi d-ak selleγ,
awal winnaken i t-yennan
ma yeẓṛa sanda yeffeγ ?
mačči d-neţţa i di yecqan
ur yiγaḍ mi yides feṛqeγ,
a yawal i di yenγan
mi d-kiḍ seg win ḥemmleγ…

ṭseγ d(eg) urrif d uγilif
tanekra yinu di ndama,
talemast tugwik a rrif
rrif ur yezmir-ara,
a win yeţţnadin nnif
kulec yella ma d-win yekfa,
a win ur nezmir i lḥif
kullec ullac ma d-win yella,
a win yeţţnadin nnif
kullec yella ma d-win yekfa,
a win ur nezmir i lḥif
kullec ullac ma d-win yella…

a yimezgan wer neggan
s-wannuz i-ţţ-εeddin γurwen,
ma teẓṛam tidak yellan
teẓṛam tin id aγ yuγen,
ma yitbiren d-iseflan
ad zin igerfiwen,
tegwrad nuba i yeṣγan
teẓṛam lbaz amek aken,
ma itbiren d-iseflan
ad zin igerfiwen,
ma twallam rebḥen yesγan
wallit lbaz it yuγen…


Zedek Mouloud
Liḥala n tmurt - 2008



Transcription : Icerfan
Modifications apportées le 17/02/2010

Icerfan 08/06/2011 21h16

Aderwic

Ur yeẓri anida yella
ur yeẓri ansi i d-yekka,
ur yeẓri sani i teddu
ur yecfi ansi i d-iεedda
mi g-dda uḍaṛ-is, yedda,
mi g-aεya ad istaεfu,
yelḥa i usemmiḍ di cetwa
iṭij deg nebdu yeṛγa
i llaẓ, εeryan d leḥfa
aken akw neţţa ad i leḥu
d-aderwic, d-aderwic,
d-abrid ay s-igan aḥric...

ţţaḍnen akw medden, yuḍen
d-aṭan-is ig gan aken
yal wa d-amek i d-as tecṛeḍ,
d-daεewsu i t-yuwten
d-dnub, d-lεib wi t-yebwḍen
wi g bweḍn anda yebweḍ ?
xas ur yeεğğib i yiwen
ur yufi-ara aken niḍen,
ur yeksan ḥed it yuγen,
ur ekkat a gma, i neṭed,
d-aderwic, d-aderwic,
d-abrid ay s-igan aḥric...

ur d-iclig deg wayen nnan
ur d-iclig deg wayen yellan
ayen yellan degs i sikid,
iḥbiben, allag, imawlan
yefuk ur d-yegwri laman
teṣaweḍ tyuga ar weḥdid
win id yugwran deg webrid,
ma yella yugwi axxam
i d-as ţţ-yegan d-at wexxam
seg wexxam i gan abrid,
d-aderwic, d-aderwic,
d-abrid ay s-igan aḥric...

zik-nni am kunwi ig lla
yedder-as aken i d-as yufa
ur yenwi ḥed as teḍṛu,
win yuyesn ayen yurğğa
yerğğa ur d-iban wara
ar melmi ar a yerğğu ?
tebweḍ anda ur s-yezmir-ara
yejbed-d tqaṛṣ snesla
ur yezmir ḥed i lexla
ullac di tagga at waḍu,
ma teḥṛes, ma teḥṛes,
ibwas a d-jebd aseγṛes,

ma teḥṛes, ma teḥṛes,
ibwas a d-jebd aseγṛes,

ma teḥṛes, ma teḥṛes,
ibwas a d-jebd ar ţţγṛes…

Zedek Mouloud




Transcription : Icerfan

Icerfan 08/06/2011 21h17

A weltma

Xas teγaḍeḍ-iyi,
d-acu ar am xedmeγ ?
di tyita am tiggi
d-acu ar a bedleγ ?
irad-as Ṛebbi
abrid ur nexli
a taγeḍ, a t-aγeγ,
waggi d-akagi
wallit akkeni
teṛwiḥt a-ţţ-ffeγ,
a weltma xas ru
ad εedment wallen-im,
ziγ a d-am teḍṛu
ma kem i d-yaweḍ mmi-m…

yesteqs-ad leğğl-is
neţţa dayen asa,
tin d-urzem s-iri-s
amek i d-as teḍṛa ?
tin yewwet zehr-is
yerab wexxam-is
ar γuṛem i d-tegwra,
bded γef leḥq-is
bded γef warraw-is
ur zmiren-ara,
a weltma xas ru
ad εedment wallen-im,
ziγ ad am teḍṛu
ma kem i d-yaweḍ mmi-m…

xas a d-as tecfuḍ
tεedda fell-am,
xas ṭlam …
xas yeḥzen wexxam,
ibwas a-ţţ-ḥluḍ
ibwas a-ţţ-zhuḍ
a d-zin laεwam,
ibwas a-ţţ-ţţuḍ
xas ur teteţţuḍ
amenzu n tasa-m
ibwas a-ţţ-ḥluḍ
ibwas a-ţţ-zhuḍ
a d-zin laεwam,
ibwas a-ţţ-ţţuḍ
xas ur teteţţuḍ
win yezan tasa-m…


Zedek Mouloud




Transcription : Icerfan


Fuseau horaire GMT +2. Il est actuellement 00h50.

Édité par : vBulletin® version 3.8.0
Copyright ©2000 - 2024, Jelsoft Enterprises Ltd. Tous droits réservés.
Version française #13 par l'association vBulletin francophone
Sahelkabylie-infos.com