Awal
 

Awal

A yaḍaṛ yeddan ḥafi
yexuṣ lemer di tcefuḍ,
ayen i tḥefḍeḍ di tikli
lemer taktabt a-ţţ-taṛuḍ,
ayen ik d-yegwran di cwami
ur teţţεawaḍeḍ a teţţuḍ,
(de)g webrid ik truğğa tṛuẓi,
a yaḥbib,
ur teţţεawad-ḍ a telḥuḍ,

a yallaγ i sent i cefun
ixuṣ limer di tleḥuḍ,
tezmerḍ a t-jemeεḍ leqrun
tezmerḍ a ten i d-tesefṛuḍ,
i wayen la yeţţnulfun
teseḥsabeḍ ur teţţḥulfuḍ,
lecγal di lqaεa i ḍeṛun,
a yaḥbib,
kečč deg genni i t-teduḍ,

a tiṭ yellin teţţwali
limer a tẓeṛḍ ayen yefren,
a d-dlud (γe)f ayen ur nelli
a d-zwireḍ kra d-ilallen,
as m-ar a teflali tmuγli
as nsemi aken nniḍen,
ayen ilhan qebl a d-yeγli,
a yaḥbib,
a d-as nesendi ifasen,

a wid yetsegimen awal
ixuṣ lekdeb d lmelḥ-is,
a wid yesuguten awal
txuṣ tideţţ d lsas-is,
a wid yesexdamen awal
mkul wa fekt-as lkaṛ-is,
kul yiwen lğğiha imal,
a yaḥbib,
wa meεduṛ, wa d-lḥeq-is,



Transcription : Icerfan
Modif’s : le 26.12.10

Izurar


D-duḥ-nneγ if i ncennu
atan di tegnaw yulli,
d-mmi-s anda yebγa yeddu
di ṭiq a t-id-yemekti,

mi nṣebḥ af idurar-im
a tamurt-iw
a d-aγ tiẓiḍ tmuγli,
ṛuḥ yeččud s-akal-im
a tamurt-iw
siwa yes ig ţţili,

mi nebεed fellam
d-lxiq i d-yerzen deg wulawen,
wa yeţţmekt-id acewiq,
wa yeţţxayal-d isafen,

mi nṣebḥ af idurar-im
a tamurt-iw
ţţaken-aγ-d tazmart nsen,
ṛuḥ yeččud s-akal-im
a tamurt-iw
akal-nni iγ d-yesekren…

ak awiγ sanga nḥas akw d-dehb mlalen,
ak awiγ sanga tirugza d lεib ţţlalen,
ak awiγ sanga ur yekat lmizan s-allen,
wezn aken ik yehwa, ur teţţafeḍ lğğiha ay malen,

kul taddart, tcuba azrar γef drar
yecuden mebγir amrar s-icerfan,
tamurt-iw d-izurar af idurar
yecuden mebla imurar s-igenwan

ma yella tebγiḍ γuresn i waken a d-gemḍ lqiq,
ma yella tebγiḍ γuresn aken at uzureḍ ṛqiq,
ma yella tebγiḍ at εediḍ s-tehri di ṭiq,
ak nγen deg iḍ, sebḥ ak-id-awin d-acewiq,

kul taddart, tcuba azrar γef drar
yecuden mebγir amrar s-icerfan,
tamurt-iw d-izurar af idurar
yecuden mebla imurar s-igenwan

at waliḍ nnif, winnaken af i d-ak ḥkan,
at waliḍ lḥif yeţţṛuẓun irgazen ur knan,
at waliḍ asif andaken ur uzlen waman,
at waliḍ asif andaken yeţţazal laman,

kul taddart, tcuba azrar γef drar
yecuden mebγir amrar s-icerfan,
tamurt-iw d-izurar af idurar
yecuden mebla imurar s-igenwan

at zeṛḍ udmawen amek i la-ten qazen wusan,
at waliḍ allen a d-ak i d-yeḥkun kra yeḍṛan,
at zeṛḍ ifasen anda leḥun idamen yeṛγan,
at zeṛḍ iḍaṛen, wid i kerfen seg waken lḥan,

kul taddart, tcuba azrar γef drar
yecuden mebγir amrar s-icerfan,
tamurt-iw d-izurar af idurar
yecuden mebla imurar s-igenwan

ak awiγ sanga ariḥa n-lwerd d-amkan-is,
ak awiγ sanga ariḥa n-lbaṛuḍ d-aṛfiq-is,
ak awiγ sanga ariḥa laṣel d-axxam-is,
ak awiγ sanga ariḥa n-tegmaţţ d-akal-is,

kul taddart, tcuba azrar γef drar
yecuden mebγir amrar s-icerfan,
tamurt-iw d-izurar af idurar
yecuden mebla imurar s-igenwan

at zeṛḍ lγaba tinnaken ur nqebl-ara aḍaṛ,
at zeṛḍ tejra, teṛγa, tejreḥ, tugwi at qaṛ,
at zeṛḍ tejra, γas tekfa, yeţţidir uẓaṛ,
γers akw i d-nerra, nḥefeḍ sekra i d-aγ teṣγaṛ,

kul taddart, tcuba azrar γef drar
yecuden mebγir amrar s-icerfan,
tamurt-iw d-izurar (γe)f idurar
yecuden mebla imurar s-igenwan


Transcription : Icerfan
Modif’s : le 26.12.10

Amusnaw


A wi ddan d wi t-yifen
ad yeţţaεnad, at yawed,
wama win i d-nemsawa
ulla wi refden wayeḍ…

lukan lliγ d-amusnaw
wi ţţrun anida yella
a t-id seḥerγ s tirga-w
ad yuγal ad yeţţaḍṣa,

a d-as kseγ yakw isem
i wayen i ţţruẓun layas,
a t-id rreγ d-asirem
mkul yiwen ad yawi ayla-s,

anda yella yiles i qesḥen
yal meslay qbel as d-ibru,
as rreγ awal ilaqen
a t-id yehḍeṛ d-asefru

ad rreγ targa b-waman
i mkul tejra ar tefsu,
di tmurt ad yezraε laman
mkul cedda ar tefru,


i m-ur lliγ d-amusnaw
ceγleγ-d ad zehuγ allen-iw,
γer daxeli ţţaraγ tirga-w
yisent i tṣebiṛeγ ul-iw,

neẓṛa asirem la yγelli
ur nufa ansi a d-yeţţwaṭaf,
nγunza-t armi iγ yugwi
di teγmaṛt neǧǧa-t yekref,

… i xedm ceγl-is
tqubel-it id tsusmi,
kra b-wi g ddan di ṣuq-is
anda ig bγa ad iεeddi,

tcebek si mkul tama
nerna-yas zit i tmes,
laman deg jajiḥ yeṛγa
yegwra-d kan yiγed aγ yames,


lukan lliγ d-amusnaw
mkul m-ar a bḍun watmaten,
asen d-awiγ laεnaya-w
ad uγalen ad mlilen,

sekra b-wayen ig ṛẓa cwal
a t-id jbeṛγ s lehna,
lǧǧerḥ if a sres-γ awal
mi g-ṭeṣ a d-iṣbeḥ yeḥla,

win d-yelhan d yiman-is
di dunit yiwen ur t-iţţγaḍ,
ad kes-γ agu (γe)f allen-is
a d-iẓel afus γer wiyaḍ,

ancaf kul ma d-iseweq
si lbaṭel i neǧǧern wurfan,
a d-as rreγ adrar n lḥeq
d laεqel yettsegimen usan,


imi ur lliγ d-amusnaw
zegwir-γ ugur awal,
zgiγ txeṛb niya-w
xas tagmaţţ a d-tsawal,

cwal nuγal d-axxam-is
yes akw i teddunt temsal,
yeks-as i lehna amkan-is
ur tezmir a d-tinni awal,

kul wa yelha d yiman-is
yiwen ur yeţţḥader wayeḍ,
win i d-yufa (de)g webrid-is
m-ur s-iwexeṛ ar d-at yeṛkeḍ,

temwγeṛ d fad leḥkem
zedγen si yal d-aqeru,
win yezmern, ad yesεu isem,
ma d-wayeḍ cedda as-yeknu,


maεna ma lliγ d-amusnaw
a lqum ad bedleγ tikli-k
a d-yas Ṛebbi di tirga-w
a d-yinni : lhu d-yiman-ik...


Transcription : Icerfan
Modif’s : le 27.12.10

Labas a yaḥbib

Labas a yaḥbib, labas,
xas llaẓ yebwḍ-d s-imnaren,
kul timsaεreqt s-nuba-s
yak nant-id yemγaren…

maεni tawant d-acuţţ kan ?
twallaḍ i d-teţţawi,
muqel s-aεebud yeṛwan
yefk i wallaγ taguni,
tawant-nni d-ak yesan
ak tesgen mebγir lawan
ma d-llaẓ ak i d-yesakwi,
tecfiḍ aken t-id-nnan
wid i jerebn akw ẓṛan
win yeṛwan yexdaε Ṛebbi,

labas a yaḥbib, labas,
xas ma nuγiţţ di ṣeḥa,
kul timsaεreqt s-nuba-s
nant-id imezwura,

d-acu i d-as nerr i seḥa
lğğehd diṛ i d-yeţţawi,
kra b-wi helken di ṣura
yuγal d-aqṛib Ṛebi,
ma yell(a) daya i d-aγ yura
nṣebṛ i mkul tiyita
dwa γures ig ţţili,
ur d-aγ ţţuγalet-ara
am (w)in yeţţnadin yenwa
ad ibedl i zman tikli,

labas a yaḥbib, labas,
xas lefhama teğğayeγ,
kul timsaεreqt s nuba-s
nant-id wid i neţţneγ,


lefhama acu i d-teţţawi ?
urfan, laεtab ak γeḍlen,
amarezg b-wi(n) ur neẓṛi
fellas leεyub ţţwaksen,
muqel γer lmal di lkuri
ma ţţxemimen i wasagi ?
neγ s-ayen a yeḍṛun yidsen ?
ţţidiren mebla nhati
ayen a yillin, ad yili,
urğğan wi i ten i d-ixelqen,

labas a yaḥbib, labas,
xas lḥeq yedem lqec-is,
kul timsaεreqt s nuba-s,
nant-id ur neţţḥesis,

anida aken ig fuk lḥeq
andaken yebda lbaṭel,
diri-t yiṭij ma yeḥeṛeq
diri-t wasif ma yeḥmel,
ur neksan, yebγa a d-yenṭeq
yeţţεegiḍ, yebγa ad yefreq
sin watmaten di laṣel,
lbaṭel d-gma-s n lḥeq
gerasen yezga luwfeq
kul wa nuba-s a ţţ-neqbel,

labas a yaḥbib, labas,
xas tilleli d-awal kan,
kul timsaεreqt s nuba-s
nant-id wid i εedan,

maεni d-acuţţ tlelli
i win ur s-nezmir-ara ?
teẓṛiḍ d-acu d-teţţawi ?
teţţara lεebd yestufa,
yeţţnadi (γe)f ayen ur nelli
ma yers, yeţţnadi ad yali
ma yulli, ur yeskid-ara,
ma yella ẓeṛb as yeγli
kul tagwniţţ ar d-a-ţţ-yerwi
xas ma yeţţnadi ur yufa,

labas a yaḥbib, labas,
xas neqim d-inegura,
kul timsaεreqt s nuba-s
nan-d ur numin-ara,

tamacint n-zman tfat
neţţrağğu a d-tejbu tayeḍ,
lḥeq n rekba neččat
ansib wis m-aγ d-isiweḍ ?
nεemd i lhed ntebεat
yir aẓaṛ, yemγi neğğat,
nferḥ … at nelqwed,
asa kra i nxedm, nwalat
si yal d-agejdur nesat
wara a yεemedn at yefreḍ ?


Transcription : Icerfan
Modif’s : le 26.12.10

A win i run, a win yeḍṣan


A d-nawi lḥerz akem iṣṛen
γef wid ikem igaren s-tiṭ
a d-nawi ṭebba akem ẓṛen
i waken a d-tegemḍ cwiṭ,

widak i d-yeţţaṭfen
di ruḥ-nni i d-yeqimen,
yeţţenser si ger ifasen
lehlak ikem yeγzan teẓṛiṭ,

lehlak-im, siwa nekwni,
a tinaken ur d-aγ neţţγaḍ,
t-ţţmeţţateḍ neţţwali
amzun mačči nneγ, b-wiyaḍ,

aḥric di dwa yeţţnadi,
aḥric di lkufn i ţţxiḍi,
aḥric amenzu yeγli,
yeğğa akal-im d-asemaḍ…

aţţan meskint tluled
yebda yemγi-s yeğğ uğğged
tufrar-d nig lqaεa,

win ţţiwalan, yesawled
i wayeḍ, yennay-as : «azled !»
nwan seεd-is yeḥla,

w-ur neţţwali, yecmumeḥed,
win yeţţwalin yeqared
d-uqaṛu-s a d-yeḍru kra…

a wi run, wi ḍṣan,
kif kif, tikwal ma yezegd uγilif,
lehlak i cuba ḥelu…

wid yeţţmeyizen, ţţanin,
ḥemlen a d-aγ t-id-inin
kul seεqa s-teslent-is,

γas meẓi waεḍaṛ meskin,
uguren ma t-seγlin,
ad yeker, ad yezwi iman-is,

teţţaḍṣaḍ a w-ur nesin,
tegugemḍ a w-ur numin,
mi γḍeln lbaz wafriwen-is,

a wi run, wi ḍṣan,
kif kif, tikwal ma yezegd uγilif,
lehlak i cuba ḥelu…

tmal γer lğğiha yeqḍaεn,
tmal γer lğğiha yeḥfan,
alemas zgan ţţunt,

lferḥ s-zyada i tefkan
almi ig uγal d-iγeblan
seg waken (…) la d-sesrun-t,

yeqar-as win i wallan :
acuγer iṭij yečča aman ?
aman, iṭij ţţγumunt,

a wi run, wi ḍṣan,
kif kif, tikwal ma yezegd uγilif,
lehlak i cuba ḥelu…

tcubaḍ γer tejra
lğğerḥ mkul mi d-yusa
tiqceṛt a tεawed tajḍiṭ,

lemr a d-tefsi (…) ma nenuda
acḥal lğğerḥ i tεeba
d-ayen ur tqebelḍ a tiṭ,

nugwad yibwas tiyita
tinaken ur nḥelu-ara
d-aẓaṛ a yakal teččiṭ,

a wi run, wi ḍṣan,
kif kif, tikwal ma yezegd uγilif,
lehlak i cuba ḥelu…

a wi ţţ-yeran a d-tecbu
γer wedrar ur neţţhudu,
tebna Ṣeḥṛa s-reml-is,

win i d-yusan at yeεnu
fellas i rekḍ, i rennu,
kul amẓuṛ yeğğa later-is,

deg iḍ yeself-as waḍu
aken a t-iṣegm, ad yeṣfu,
amzun yiwen ur t-yeεfis,

a wi run, wi ḍṣan,
kif kif, tikwal ma yezegd uγilif,
lehlak i cuba ḥelu…

a wi εegeḍn a d-yinni
awal ad yaweḍ igenni
igenni a t-id-yeseγṛes,

aḥemal a d-yeseγli
a d-yers, ad yebdu tirni
kra yeṭfen ar d-at yekes,

ayen yellan, ar d-at yawi,
a d-illal wayen ur nelli,
aγ ibedl adif iγes,

a wi run, wi ḍṣan,
kif kif, tikwal ma yezegd uγilif,
lehlak i cuba ḥelu…



Transcription : Icerfan
Modif’s : le 26.12.10

Cna amehbul


Cna yagi d-amehbul
agi d-amehbul
am (w)in yegulen yeḥnet,

cna-w (iwu)mi xeṛben lemtul
mi xeṛben lemtul
a yatmaten ur katet,

m-ur a wen d-yezgi γef wul
xas ḥsebteţţ d-aserwet,
xas ma d-aserwet
dem-t aγeṛbal sifet…

yennayas wungif : « aka,
ah wungif : aka
a d-teddu naγ a d-tefk isem-is »,
tella tecεel, haţţ, tensa,
tecεel, haţţ, tensa,
times (de)g i nezhent wallen-is,
yeţţwali nebεid ur yeẓṛa
tin yeṭfen deg jufar-is,
« yesbaεdent wallen-ik,
muqel anda yedda uḍar-ik !»

a yaṣegaḍ s-iγimi,
aṣegaḍ s-iγimi
ṣegm (γe)f znad afus-ik,
ah naγ s-tmuγli,
i teţţmeyizeḍ lγeṛḍ-ik,
γas aken tḥuzaṭ, yeγli,
mačči d-winna i d-axṣim-ik,
mačči d-allen kan
awalli b-wid it yesεan,

sani tmeyeẓḍ ak teffeγ
ah ar d-ak teffeγ
a win yeţţazun iγes,
tasraft n lwiz-ik teffreγ
n lwiz-ik tefreγ
as maken ik yeγḍeṛ yiḍes,
aγilif ifaden-ik yezdeγ
rnu ray-ik d-amwanes,
ğğteγ a nεeddi
ur mazal yidwen tikli,

a yabeḥri d-yetṣuḍun
abeḥri d-yetṣuḍun
… i yiger, tεediḍ,
tekiḍ-d (γ)ef wid i teţţun
(γ)ef wid i teţţun
i waken a ten i d-tesmektiḍ,
anfasen i wid i cefun
timeqbeṛt tedduri lḥir,
a lmiytin cfut :
win yeţţun, yeder yemut,

tebγam-ţţ, ur ţţ-tebγim-ara
naγ ur ţţ-tebγim-ara
sefruteţţ-i-d a nwalli,
a wid yegunin tara
yegunin tara
teswamţţ almi d-teṣenṭi,
m-ig ban lḥeb-is yefra,
leḍyur bwint d-imensi,
i εeda-k-wen lḥal
ur d-yegwri yidwen wawal,

beddeγ di tiγilit selleγ
di tiγilit selleγ
i ubeḥri i d-yebwi ṣuṭ,
sliγ i waεbeṛ yeffeγ
i waεbeṛ yeffeγ
d-tiγri i tebεen lmut,
ma tfehmemţţ aken i ţţ-fehmeγ
a nruḥ a nεezi tafsut,
ya ṭiṛ i εeddan
mi tṛewled, tbedelḍ amkan,

a wid ur nzegel lewqat
ur nzegel lewqat
dεut a t-ḥebs tγeṛsi,
a wid i zeglen taswaεt
i zeglen taswaεt
teğğam acudu ur yefsi,
mi twalam alluy yefat
ḥebert a t-ṣegm trusi,
lhem i ḥemleγ
si duḥ i yides neţţlal,

cna yagi d-amehbul
agi d-amehbul
am (w)in yegulen yeḥnet,

cnaw (iwu)mi xeṛben lemtul
mi xeṛben lemtul
a yatmaten ur katet,

m-ur a wen d-yezgi γef wul
xas ḥsebteţţ d-aserwet,
xas ma d-aserwet
dem-t aγeṛbal sifet…


Transcription : Icerfan
Modif’s : le 27.12.10