Asefru
 

Asefru



A win tečča tfenṭaẓit
d-acu i d-ak d-ğğa af yiri ?
tenwiḍ tefhemḍ dunit
tenwiḍ tufiḍ-d iγisi,
tura mi tefhemḍ, ẓṛit :
iγisi-s d-keččini...

ayen yeḍṛan yides drus
wi(n) (i)s d-ihdern at yesefṛeḥ,
uḥricen katen-as afus
srusun-t-id γer cḍeḥ,
mi εyan zwin abernus
deg unar ğğan-t yefḍeḥ...


ekert a nebdut tikli
skud i mazal tafat,
mkul ma neffeγ i tizi
ad aγ d-qablent snat,
ekert a nebdut tikli
a yarfiq rfed asefru,
am yiḍelli, am asagi,
aγ yesebded ma naεyu,

taεkwemt ẓayet (γ)ef tuyat
a d-tifsus ma d-nceweq,
ma nwala lbaṭel ntebεat
asefru a d-aγ d-yerr γer lḥeq,
ma d-ayla-nneγ zman yeččat
naγ mazal i d-iseweq,
ma yeda-d defir, nurğğa-t,
ma γer zdat, ar d-at nelḥeq,

ufiγen ameddaḥ yettru
yesfehm-iyi-d acimi,
asefru-s yedmit waḍu
ur yeẓṛi anida yeγli,
yugwad a t-yeṭef wemcum
ad i fehm ayen ur nelli,
yebγa ad i ẓeṛ ma teddum
fell-as m-ar a d-yesteqsi ?

macahu γef win yeẓṛan
macahu γef w(in) ur neẓṛi,
yiwen yegwad ayen illan
wayeḍ seg wayen ur nelli,
macahu (γ)ef (w)id yetabaεn
abrid ur nban sani,
ayen i nudan, ayen i yufan,
s-ayen bγan ur yeččabi,

***

tefkam lqima i wawal
i ṣegmen wa zdat wayeḍ,
ur yezmir a t-yeṛẓ lḥal
wer yezmir ḥed a t-yeṣfeḍ,
γas zman yettembedal
γas wa ad yemmet, wayeḍ a d-ilal,
kul lweqt a t-id-yesiweḍ,
aken bγun bedlen lecγal
ad yettεegiḍ, ad yettazal,
mkul amkan ar d-at yaweḍ,

d-acu tegwaḍed ak yinni
usefru iwumi tegiḍ tillas ?
tefreṭ yiwen ur d-as yesli
d-akal i tesdeḍ fellas,
am εeqqa g-ired i ttfukti
mkul amkan dges yemγi,
yefka-d tigedrin aṭas
win yelluẓen sges yebwi
win t-yeččan, allen a sent yelli
ad as i mel abrid ma yeεarq-as,

asefru γurek i ttweḥqeṛ
lamaεna nig-ek ig εeda,
imi tekrehḍ acuγeṛ
is tesenγaseḍ di lqima ?
aken meẓiyeḍ, ig meqweṛ,
anect texsiḍ, i d-inewweṛ,
yesaγ-d iṭij (γe)f tmura,
kul uḥdiq ar d-at yeṣγeṛ,
ayen yettu, as t-id-yefeker,
ma d-kečč, ur tfehemḍ-ara,

a yul-iw bezef terfiḍ
zeεf ur d-ak d-ittawi,
aken llan medden, tilliḍ,
susum ulla d-keččini,
naγ cnu γef tin tebγiḍ
medl allen-ik aken a-tt-twaliḍ
u nettat ak i d-twali,
γef iğğeğğigen a tγeniḍ,
siwa tafsut a tt-tettmeniḍ
dunit a tcebḥ arkwelli !



Transcription : Icerfan
Modif's : le 26.12.10

Ḥmed Umerri

Ulla d-win t-inγan
ur yebni fellas,
yenγat s-laman
tegwra-d lmaεna-s :
« aqbayli, a d-iban,
a t-yenneγ uqbayli… »
Aḥmed Ummeri
i γab am yitri…

mkul wa yenna
d-nek ig ẓuwṛen,
kra a xedmen εecṛa
a t-yexdem yiwen,
wer teḥmilem-ara
awal n tdukli
Aḥmed Ummeri
i γab am yitri…

ur ttagwad leḥruṛ
d-labṭel ur t-snen,
wer qebeln ẓuṛ
m-ar ak i d-qesḍen,
ttagwad laεruṛ
ur nesεi ifaden,
ma zegden lehduṛ
alarmi tteklen…

ayen (γe)f i tteklen
ur s-tezmiṛeḍ-ara,
ayen is i laεben
m-ur tesineḍ-ara ?
taqaεtt, ixxamen,
iqjan d-iqara,
xemsin m-ar a mten
a d-εiwden miyya…


Transcription : Icerfan
Modif’s : le 25.12.10

Ayla-m

Ayla-m εeqlit
γurem ad as tebruḍ yibwas,
a taqbaylit
yecreq yiṭij, yulli was,

xas ma nettneγ
deg menuγ ad yek nfaε,
aẓar-nneγ
deg ul ibed, iṣeḥa,
freḥ yis-neγ
ma truḥeḍ d-acu nesεa ?
kem d-yemat-nneγ
geraneγ nefhem neẓṛa,

win iruḥen
yella wayeḍ g mkan-is,
win i feclen
a nebded s-idisan-is,
wi kem i ḥemlen
fellam isebel ruḥ-is,
iεebd-ikem
yisem ig sbed lqed-is,

ma neğğa-kem
ğğan-kem wid i tqurεeḍ,
anga-t wudem
is ar a nqabel wiyeḍ ?
aqlaγ yidem
nesεa-kem aken d-aγ tesεaḍ,
nettwali yisem
aken yisneγ i twallaḍ,

laṣel d-aqdim
ur iruḥ aken a t-id-nerr,
ur ttxemim
ma di ṭiq naγ di liser,
tameslayt-im
wa tt-iγeḍlen ma yezmer ?
ma d-araw-im
yisen i tbed-d Lezzayer !


Transcription : Icerfan
Modif’s : le 26.12.10

Ameddaḥ

Regmeγ-k a gma ur ţţ-ṣeḍḥiγ
ayen aken akw i d-ak nniγ
i ḥuz-ak ur d-iyezgil,
ma γelṭeγ deg wayen ẓṛiγ
aqli d-lεebd ay lliγ
ahat zegdeγ-as i lkil,
yak teẓṛiḍ sgek d-acu rğğiγ
ur k-qalegh, ur d-iyi-ţţqil
bγiγ kan ak steqsiγ :
« amek i tega tideţţ ? mmel-iyi... »
uh, uh,
sameḥt-iyi
nek d-ameddaḥ ur netṣeḍḥi
ur n-ḥebbes di tikli,
ţţabdden tabburt, tabburt,
ayen i nwa tideţţ a t-yinni...

teslam-asen-d mi nnuγen
di mkul lğğiha ṣuγen
wa maεdur, wa d-lḥeq-is,
tadukli b-was-mi kerzen,
naγ mi zraεn, naγ mi srewten
truḥ wer d-igwri later-is,
ḍegren ayen if i εetben
kul wa ig ḍegeṛ d-iγsan-is
yeqaṛ-as dayen i ketben
xarsum yetṣebiṛ ul-is...
uh, uh,
sameḥt-iyi
nek d-ameddaḥ ur netṣeḍḥi
ur n-ḥebbes di tikli,
ţţabdden tabburt, tabburt,
ayen i nwa tideţţ a t-yinni...

afcal-ik anga tufan
mi sen yehwa naγ mi stufan
snen a d-jebden lexyuḍ,
wis ma d-ul-ik ig lhan
naγ imi tesεid laman
ik faqen amek i teteduḍ ?
ak i d-awin di nnican
rran-k sanda bγan, telḥuḍ,
as mi bwḍen s-ayen akw bγan
ğğan-ak allen-ik a truḍ...
uh, uh,
sameḥt-iyi
nek d-ameddaḥ ur netṣeḍḥi
ur n-ḥebbes di tikli,
ţţabdden tabburt, tabburt,
ayen i nwa tideţţ a-t-yinni...

lferḥ-ik a yaqbayli
ma tesleḍ yiwen ak yinni :
« tirugza d-kečč i d-bab-is »
sanda i d-as yehwa ak yawi
as tuγaleḍ d-lfuci
ar a yrefd ger ifasen-is,
ak yeţţεemir s-yimi
yisek ar a yeγeḍl aεdaw-is,
di teγmeṛt ak yeteki
ma yekfu yisek ceγl-is...
uh, uh,
sameḥt-iyi
nek d-ameddaḥ ur netṣeḍḥi
ur n-ḥebbes di tikli,
ţţabdden tabburt, tabburt,
ayen i nwa tideţţ a-t-yinni...

***

Tagmaţţ s-yiles ḥlawen
neţţbedil-as di ṣifa,
γas aken deg ulawen
s-wawal aṛẓagen nḥulfa,
neḍmaε tagmaţţ d-ilulen
nregmiţţ mi ţţ-nwala,
neţţağğa-ţţ tezga tuḍen
neţţru γef lğğehd-is yekfa,
neţţruẓuyas ifadden
amzun nugwad ma teḥla,
a gma xas mel-iyi
ma telha tegmaţţ ma tili ?
a gma xas mel-iyi
ma telha s tideţţ naγ ala ?

fehmeγ-k tfehemḍ-iyi
sayen i nsarem a neffeγ,
a d-nesnulfu tadukli
a d-nernu wiyaḍ γerneγ,
a nesexdem di lγaci
alama teddun yisneγ,
dinna simir a nwali
anwa ar a yeẓewṛen geraneγ,
yiwen a d-iṣeḥ ukursi
m-ur i tekiseḍ, ak kseγ,
a gma xas mel-iyi
ma telha tdukli ma tili ?
a gma xas mel-iyi,
ma telha s tideţţ naγ ala ?

lluẓeγ kečč telluzeḍ
ilaq-aγ a neddukel,
γef wid γ-icban a nḥafeḍ
lḥeq a t-id-nsekfel,
ayla-nneγ ar d-at naweḍ
a nekes tamεict n ddel,
mi neṛwa laẓ at nesfeḍ
nekwni d wid i rebḥen naεdel,
s-ameγbun ur ntenneḍ
amer ad aγ d-isiwel,
a gma xas mel-iyi
ma telha tawant ma tili ?
a gma xas mel-iyi
ma telha s tideţţ naγ ala ?

a nennaγ γef tlelli
yidenγ ayen i bγun yeḍṛu,
kret a nebdut tikli
snesla icudden a-ţţ-nefru,
a nefk nuba i lγaci
kul wa as nṣefḍ ayen iru,
ad as nbeddel tikli
siwa aken ilaq ar a telḥu,
win ur nhedder am nekwni
ar d-as nesifeg aqaru,
a gma xas mel-iyi
ma telha tlelli ma tili ?
a gma xas mel-iyi
ma telha s tideţţ naγ ala ?

wigi yetṣegimen cna
γer lğğiha-nneγ a ten id nernu,
a sen nnini neţţdafaε
γef teqbaylit a d-teḥyu,
ad aγ d-εiwnen merra
kul yiwen a d-yehdu asefru,
mi nebweḍ s-ayen nebγa
ṣut nsen ar d-at nemḥu,
ulla d-afrux di lexla
at neṣegeḍ ma yecnu,
a gma xas mel-iyi
ma ţţaqbaylit i neţţnadi,
a gma xas mel-iyi,
naγ ma d-akwersi i nebγa



Transcription : Icerfan
Modif’s le 26.12.10